Get Adobe Flash player

नेवाः देय् दबूया मूदुजः पुचः

नेवाः देय् दबूया
मूदुजः पुचः
नायः : नरेशकुमार ताम्रकार
न्वकू :  कृष्ण उदास
न्वकू : शंकरराम श्रेष्ठ
न्वकू : चन्द्रलाल राजभण्डारी
न्वकू : शंकरनारायण श्रेष्ठ
न्वकू : दिपककुमार श्रेष्ठ
न्वकू : मिलन श्रेष्ठ
न्वकू : एककुमार श्रेष्ठ
मूछ्याञ्जे : माइलाबाबु द्योला
दांभरि  :  अन्जीता खड्गी 
छ्याञ्जे   : सत्यनारायण डंगोल
छ्याञ्जे  शान्त श्रेष्ठ
छ्याञ्जे  यशोदादेवी श्रेष्ठ
मूदुजः : बसन्ता श्रेष्ठ
मूदुजः : अनिल मास्के
मूदुजः : महेन्द्र लिगल
मूदुजः : निर्मला श्रेष्ठ
मूदुजः : लक्ष्मी शाक्य
मूदुजः : सीता श्रेष्ठ
मूदुजः : रश्मिला प्रजापति
मूदुजः : सुन्दरी श्रेष्ठ
मूदुजः : कमल श्रेष्ठ
मूदुजः : घनश्याम श्रेष्ठ
मूदुजः : हरिकुमार श्रेष्ठ
मूदुजः : देवेन्द्रकुमार श्रेष्ठ
मूदुजः : त्रिरत्नलाल शाक्य
मूदुजः : खगेन्द्रबहादुर श्रेष्ठ
मूदुजः : विकास श्रेष्ठ
मूदुजः : जयकुमार श्रेष्ठ
मूदुजः : वदन राजाेपाध्याय
मूदुजः : न्हुछेकाजी महर्जन
मूदुजः :  दिना श्रेष्ठ
मूदुजः : श्यामकृष्ण श्रेष्ठ
 

 

 

नीस्वक्वःगु बुदिंया लसताय् सकल नेवाःतय्त भिन्तुना ।

Developed in conjunction with Ext-Joom.com

नेवाः देय् दबूया दाङ घोराहीइ जूगु खुक्वःगु महाधिवेशनया प्रतिवेदन—११३७

नेवाः देय् दबूया दाङ घोराहीइ जूगु खुक्वःगु महाधिवेशनया प्रतिवेदन—११३७

प्रारम्भ

ताः ईया तयारी लिपा न्यादँ न्ह्यः २०६९ सालया असोज ६, ७ व ८ गते येँय् आनन्दकुटी बिहारय् न्ह्याना दिनाच्वंगु नेवाः देय् दबूया खुक्वःगु महाधिवेशन दाङ जिल्लाया घोराही उपमहानगरपालिकाय् बैशाख ८, ९ व १० गते जुया क्वचाल । 

खुक्वःगु अधिवेशनं निर्वाचन मार्फत् न्हूगु नेतृत्व नं ल्ययेगु ज्या जूगु खः । छुं ई न्ह्यः येँय् जूगु भद्र सहमतियात महाधिवेशन स्थलय् थ्यंका त्वादःगु खःसां तसकं हे सौहाद्र्धपूर्ण वातावरणय् स्वच्छ निर्वाचन मार्फत् प्रजातान्त्रिक ढंगं न्हूगु नेतृत्व छुं नं विवाद मदयेक हे ल्ययेज्या जूगु खः । 

¥याली ब्यवस्थापन

बैशाख ८ गते सुथय् न्हापां सहभागीपिंत ज्यना याकेगु ज्या धुंकाः अनया भिंद्यः देगः दुगु थासं ¥याली न्ह्याकेगु यानातःगु खः । उकिया लागिं न्हापां नेवाःतय् थःगु हे परम्परा कथं ख्येँ सगं बियाः सहभागी सकसितं सिन्ह तिकाः झ्वः छुयेज्या जुल । दक्कलय् न्ह्यःने स्थानीय थारु समुदायया प्याखं, वयां लिउने नाय्खिं बाजं, वयां नं लिउने येँय्नं वंगु सुदन मुनिकारया पुचःया बासुरी बाजं, वयां नं लिउने येँय् नं हे वंगु शेषनारायण महर्जनया पुचःया धिमे बाजं नं ¥यालीया दथुइ दथुइ च्वनाः उगु सांस्कृतिक ¥यालीयात जिवन्त यानाच्वंगु खः । करिब ३ किलोमिटरया नगर चाहिले ज्या क्वचायेवं हाकनं नेशनल ट्रेनिङ लिमिटेडया चौरय् वयाः सभाय् हिउगु खः । 

उलेज्या सत्र

नेवाः देय् दबूया खुक्वःगु महाधिवेशन येँय् नं वःगु चर्चा नृत्यं सुरु जूगु खः । अन सुदन मुनिकारं स्यनातःगु येँय् नं वंपिं कलाकारपिंसं पञ्चबुद्ध नृत्य क्यनाः सकसितं लसकुस याःगु खनेदत । उद्घोषक माइलाबाबु द्योला मञ्चय् वंसानिसें मञ्चं कुहाँ मबतलेया निघौत्या ई तकं सहभागी प्यसः न्यासः मनूत निभालय् तयातःगु पालया तलय् च्वनाः फुक्कं हे ज्याझ्वः उलि हे ध्यान तयाः न्यनाच्वंगु खनेदत । दक्कलय् न्हापां मूपाहां मल्ल के. सुन्दर, वयां लिपा विशेष पाहां नेपाल उद्योग वाणिज्य महासंघया केन्द्रीय सदस्य धु्रबराज भारी नापं राजनीतिक पार्टीया प्रतिनिधिपिंसं मञ्च आसन ग्रहण यायेधुंकाः ज्ञान अज्ञात सहीदतय् लुमन्तिइ छगू मिनेट मौन धारण यायेगु ज्या जूगु खः । वयां लिपा ब्याकूल माइलां च्वयातःगु नेपाःया राष्ट्रिय गान, दुर्गालाल श्रेष्ठं च्वयातःगु नेपालमण्डलया गान व राजभाई जकःमिं च्वयातःगु नेवाः देय् दबूया गान यानाः छक्वलं हे स्वंगू गान न्यंकाः ज्याझ्वः न्ह्याकूगु खः । 

खुक्वःगु महाधिवेशनया सभापतित्व नेवाः देय् दबूया नायः नरेश ताम्रकारं यानादीगु खः । सहभागीतय्त नेवाः देय् दबूया मध्ये पश्चिमाञ्चल लागाया न्वकू दिपक शाक्यपाखें लसकुस यायेगु ज्या जूगु खः । दक्षिण उपत्यकाया हे दक्कलय् तःधंगु उपत्यका, विश्वया हे दक्कलय् तःधंगु त्रिशुल दुगु लागा व विश्वया दक्कलय् बागःम्ह मनू बुइकूगु व प्रादेशिक राजधानी प्रस्ताव जुयाच्वंगु दाङय् देय् न्यंकंया नेवाःतय्त लसकुस याये खंगु गौरवया खँ खः धकाः वय्कलं च्वछायादिल । 

ज्याझ्वलय् दकलय् न्हापां नेकपा एमालेया नेतृ शान्ता चौधरीं न्ववानादिल । वय्कलं देय्या माया न्ह्यब्वयेफुपिं जनजातिं आः राज्यया हरेक निकायय् थ्यंकेत मौका चूलाना नं थीथी कारणं झी लिपा लानाच्वंगु खँ कुलादिल । नेकपा माओवादी पोलिटब्यूरो दुजः व घोराही उपमहानगरपालिकाया मेयर उम्मेदवार जीवन गौतमं जातीय मुक्ति आन्दोलन नं बर्गीय मुक्ति आन्दोलनया हे छगू अंग खः धयादिल । 

राष्ट्रिय प्रजातन्त्र पार्टीया घोराही नगर कमिटी अध्यक्ष प्रभाकान्त भण्डारीं नेवाः जाति थीथी पक्षं पूर्ण जाति जूगु न्ह्यथानादिसें थःपिनि कला, साहित्य, संस्कृतियात नेवाः जातिं मेमेपिंत नं स्यनाः देय्यात समृद्ध यायेगु ज्याय् तिबः बियेमाः धयादिल । नेपाली कांग्रेसया नेता शंकर दांगीं प्रजातान्त्रिक उपलब्धीतय्गु छगू अंग राष्ट्रियता ‘मन’ जूगु न्ह्यथनादिसें विविधता दुनेया एकता झीगु विशेषता खः धयादिल । 

उगु ज्याझ्वलय् घोराही उपमहानगरपालिकाय् हे दक्कलय् थकालिम्ह १०७ दँया हरिप्रसाद श्रेष्ठयात मूपाहां मल्ल के. सुन्दरं दोसल्लां न्ययेकाः व ज्याझ्वःया नायः नरेश ताम्रकारं सिन्ह तिकाः हनेज्या यानादीगु खः । ज्याझ्वलय् नेवाः कल्चरल सोसाइटी क्यानाडाया दुजः त्रिप्रसाद धौभडेलं थः सु खः धइगु महत्वपूर्ण विषय जूगु न्ह्यथनादिसें थौंकन्हय् संसार न्यंकं मनूतय्सं थः सु खः व गनं वयापिं खः धइगु नं अध्ययनया विषय जुयाच्वंगु खँ कनादिल । अथेहे नेवाः जातिया सांस्कृतिक पक्ष व शीप ताः ई न्ह्यःनिसें च्वन्ह्याना च्वंगुलिं यानाः उकियात थातं तयेमाः धयादिल । 

दाङ उद्योग वाणिज्य संघया प्रतिनिधि हेमराज बन्सारं नेवाः समुदाय व जातिं हे सद्भावया वातावरण क्यनेगु ज्या दाङय् जुयाच्वंगु न्ह्यथनादिसें दक्ष व सक्षम कथं नेवाःत न्हापानिसें हे खने दयाच्वंगुलिं वर्तमान सरकारया नीति सरकारी, सहकारी व निजी लागायात च्वन्ह्याकेगु नीतियात नं आत्मसात याना वने फयेकेमाः धयादिल । 

ज्याझ्वःया विशेष पाहां नेपाल उद्योग वाणिज्य महासंघया केन्द्रीय सदस्य धु्रबराज भारीं दाङ नेवाः समुदायया हे पहलय् प्रादेशिक राजधानी जुइत्यंगु न्ह्यथनादिसें आः अधिवेशन लिपा हे नेवाः जातियात नेपालभाषा कक्षा मार्फत् कः घायेमाः धयादिल । 

ज्याझ्वःया मूपाहां नेवाः देय् दबूया संरक्षक मल्ल के. सुन्दरं ६४ गुलिं जिल्लां वःपिं सकल नेवाः जातिं थौं दाङयात थःगु हे थाय् थें तायेकाः च्वनेदुगु वातावरण दुगु न्ह्यथनादिसें २२ दँ न्ह्यः भक्तिदास श्रेष्ठ, सत्यमोहन जोशी, नरेशवीर शाक्य, लक्ष्मण राजवंशीपिं नापं थःगु हे सहभागीतय् नीस्वनागु नेवाः देय् दबू थौं राष्ट्रिय संगठन कथं कायम जूगु सराहनीय खँ खः धयादिल । वय्कलं खुदँ न्ह्यःनिसें नेवाः देय् दबू न सास न आश व न लाशया स्थितिइ थ्यनाच्वंगुलिं छातीइ हे तज्याइथें च्वनाच्वंगु कनादिसें कष्ट सामना यानाः नं दुर्घटना तरे यायेगु जुइ धयादिल । 

मूपाहां मल्लं नेवाःत आर्थिक व सांस्कृतिक रुपं सम्पन्न खः तर थौं थःगु ख्वाः थम्हेसियां हे स्वयाः मूल्यांकन यायेमाःगु ई वयाच्वंगु न्ह्यथनादिसें थ्व खुदँया दुने देसय् निगू तःतःधंगु संविधान सभाया चुनाव थेंज्याःगु निर्वाचन सम्पन्न जूगु इलय् नेवाः जातिं माःकथं लबः काये मफुगु दुःखया खँ नं कनादिल । द्वलद्वःया इतिहास दुपिं नेवाःत थः थः ल्वानाच्वंगु कारणं हे जक मेपिसं नेवाःतय्त राज यानाच्वंगु खः धयादिसें वय्कलं नेवाःतय्सं थःपिनि पुलांगु इतिहास कायम याना तयेत नं संगीन अवस्थाय् वयाः सहमतियात हे बः बिया वनेमाःगु खँ कुलादिल । 

महाधिवेशनया उलेज्या समारोहय् स्थानीय थारु प्याखं, येँय् नं वंगु बज्र कला कुञ्जया प्याखं नापं चर्या हुलाप्याखं, ज्यापु हुलाप्याखं व नेवाः हुलाप्याखंपाखें अन सहभागी जुयाच्वंपिं सलंसः प्रतिनिधितय्गु ध्यान सालातःगु खः । उकिं हे स्वघौति ताःहाकूगु उलेज्या समारोहय् लः जक त्वनाः नं मनूत उसिही हे मसंसें च्वनाच्वन ।

ज्याझ्वःया सभापति व नेवाः देय् दबूया नायः नरेश ताम्रकारं उगु उलेज्याय् छप्पँ छधि जुया वनेगु मल्ल के. सुन्दरया धारणायात आत्मसात याना हे थौंया आवश्यकता जुयाच्वंगु न्ह्यथनादिसें जायज ज्याझ्वःत झीसं याना वने मफयाच्वंगु दनि धयादिसें आः न्हूगु कार्यसमितिं उकियात पुवंकीगु खँ कनादिल । नेवाः देय् दबू नं थारु कल्याणकारी सभा व नेपाल तामाङ घेदुङ थें हे देसब्यापी रुपं छगू हे जक संगठन वा संस्था दयेकाः महासंघ कथं न्ह्याः वनेगु प्रतिवद्धता प्वंकादिसें वय्कलं आः हे नेवाःतय्त थीथी कथं संकट सुरु जुइ धुंकूगुलिं थुकिया निराकरण यायेत सशक्त रुपं नेवाः जाति न्ह्यःने वयेमाःगु अवस्था दुगु नं कुलादिल । 

न्ववायेगु झ्वलय् वय्कलं नेवाःतय्त नीति निर्माणया लागाय् तकं थ्यंके यंकेत आः थःम्हं खँलासि जुयाः मल्ल के. सुन्दर ड्राइभरयात ग्वाहालि यायेगु खँ नं कनादिल । 

बन्द सत्र

खुक्वःगु महाधिवेशनया बन्द सत्र घोराही उपमहानगरपालिकाया सभाकक्षय् यायेगु धयातःगु खः । तर अन थाय् मगाइगु खने दुगुलिं पुनः बहनी ६ बजे जुयालिं तिनि उलेज्या समारोह जूगु मञ्चय् हे नेवाः देय् दबूया बन्द सत्र न्ह्यात । न्हापांगु चरण कथं बन्द सत्रय् प्रतिवेदनत न्ह्यब्वयाः पारित यायेगु ज्या जुल । 

बन्द सत्रया उद्घोषक बदन शर्मा राजोपाध्यायं बन्द सत्र सुरु जूगु घोषणा याना नं जिल्लां जिल्लां वःपिं प्रतिनिधि थ्यंका मवःगुलिं उमित ध्यान केन्द्रीत याना तयेगु व सत्र सुचारु यायेगु निंतिं लोककवि राजभाई जकःमियात छुं छुं कविता न्यंकेत इनाप यानादिल । न्हापा हे थःगु म्ये, कविता व नेवाः देय् दबूया म्ये दुथ्याःगु सीडी व म्येया बोल सहभागीतय्त मियेगु ज्याय् तल्लीन लोककवि राजभाई जकःमिं छगू दर्जनया ल्याखय् अन थःगु छन्दबद्ध कविता न्यंकादिल । वय्कलं लिइपा वनाः नेवाः देय् दबूया खुक्वःगु तःमुँज्यायात भिन्तुना देछानातःगु कविता न्यंका क्वचायेकादिल । 

प्रतिवेदन प्रस्तुत यायेगु निंतिं अध्यक्ष मण्डलया अध्यक्ष दयेकातःम्ह प्रकाश पालिखें महादेव मल्लीयात मञ्चय् ब्वनेवं सनिलया ६ः३० बजे औपचारिक रुपं उगु खुक्वःगु तःमुँज्याया बन्द सत्र न्ह्याःगु खः । बन्द सत्रया सुरुं नेवाः देय् दबूया महासचिव माइलाबाबु द्योलां थःम्हं नेपालभाषा व खस् नेपाली भाषा यानाः निगूलिं भासं तयार यानातःगु महासचिवया प्रतिवेदन न्ह्यब्वयादिल । भाषा, कला व संस्कृति लागाय् जक ज्या याना वयाच्वंगु नीनिदँ क्यने धुंकूगु नेवाः देय् दबूपाखें आः अधिकारयात स्थापित यायेगु ज्याय् हे न्ह्याः वनेमाःगु खँ माइलाबाबु द्योलाया प्रतिवेदनय् दुथ्याः ।

२०६५ साल चैत ९ गते धनकुटाय् क्वचाःगु न्यागूगु महाधिवेशन धुंकाः न्ह्याकूगु देय् दबूया थीथी गतिविधि वय्कःया प्रतिवेदनय् छसिकथं न्ह्यथनातःगु दु । देसं पिने व देसं दुने संगठन बिस्तार जुजुं वनाच्वंगु नापं आः ६४ गू जिल्ला जिल्ला समिति तकं दयेकेत ताःलागु खँ प्रतिवेदनया मू पक्ष खः । उकि २०६९ साल असोज ६, ७ व ८ गते आनन्दकुटी बिहारय् जूगु खुक्वःगु तःमुँज्या असफल जूगु खँ नं दुथ्यात । चितवनय् जूगु विधान अधिवेशनय् ४० गू जिल्लां सहभागी जुयाः विधान पारित याये धुंकूगु अवस्थाय् थुगु अधिवेशनया लागिं कार्तिकं लुखा चाःगु व चैतं याये धका तयार याना नं तयारी मगागुलिं बैशाख ८ व ९ गतेया दिं क्वजिउगु प्रतिवेदनय् न्ह्यथनातःगु दु । नापं २०७३ फागुन २०—२१ गते जूगु मुँज्यां सामाजिक सचेतना जगे यायेगु ज्यात भाषा, लिपि, बाजं स्यनेज्या जुयाच्वंगु खँ नं न्ह्यथनातःगु दु । 

प्रतिवेदनय् उर्लावारी, चितवन, तनहुँया थर्पू व पश्चिम दाङ जिल्लाय् तक नं थीथी कथं बाजं स्यनेज्या भाषा स्यनेज्या यानागु व रोल्पा, रुकुम, जागरकोट नापं आपालं दुर्गम जिल्लाय् तकं संगठन विस्तार जूवंगु खँ न्ह्यथनातःगु दु । पेशागत समूह भातृ समूह कथं विद्यार्थी दबू, ल्याय्म्ह दबू, मिसा दबू, कलाकार दबू स्वनाः ज्या यानाच्वनागु नं न्ह्यथनातःगु दु । देय् न्यंकंया नेवाः बस्तीइ वना भिंद्यः स्थापना यायेत भिंद्यःया मूर्ति ग्वाहालि यायेगु, अधिकारमुखी ज्याझ्वः व सचेतनामुलक गोष्ठी यानागु नं प्रतिवेदनय् दुथ्याः । नेवाः स्वायत्त अधिकार स्थापना यायेगु अभियानं पिने च्वंपिं नेवाःतय्त जुइगु फाइदा बारे नं सचेतनामुलक ज्याझ्वः यायेगु नापनापं थीथी सांस्कृतिक ज्याझ्वः याना वनेगु प्रतिवेदनय् प्रतिवद्धता ब्यक्त यानातःगु दु । 

न्यादँ तकया ज्याझ्वः थीथी कथं न्ह्यब्वयातःगु उगु प्रतिवेदनय् दैवज्ञ कीर्तिमदन जोशीयात सःता सहलह ज्याझ्वः यानागु, धनकुटाय् तःमुँज्या लिपा केन्द्रय नेवाः छेँ दनेगु निंतिं ७० लाख अक्षय कोष ब्यवस्था जूगु, राजभाई जकःमियात लोककवि घोषणा ज्याझ्वः यानागु व थीथी ब्यक्ति व संस्थायात नेवाः देय् दबूपाखें बीगु कथं क्वछिनातःगु नारायणदेवी सिरपाः नापं ठाकुरलाल सिरपा व मेमेगु सिरपा इनेज्या ताःलाक नेवाः देय् दबूया बुदिं भाद्र २० गते क्वचाःगु खँ धयातःगु दु । महासचिवया उगु प्रतिवेदनयात कयाः आशारत्न डंगोल येँ, हरिकुमार श्रेष्ठ नवलपरासी, मणरत्न शाक्य येँ, राजेन्द्रकुमार पिया दिपायल, सुवर्णलाल कक्षपति गुल्मी, चन्द्रलाल राजभण्डारी चितवन, हरिकुमार श्रेष्ठ सिन्धुपाल्चोक, भरतकुमार श्रेष्ठ धरान, धर्मराज श्रेष्ठ लमजुङपिसं टिक्का टिप्पणी यानादीगु खः । 

टिप्पणी बारे महासचिवं उकियात संशोधन यायेगु बचं बिइधुंकाः ल्हाःपाः थानाः उगु प्रतिवेदनयात हाउसं पारित यानाछ्वःगु खः । वयां लिपा आर्थिक प्रतिवेदन न्ह्यब्वयेगु ज्या नेवाः देय् दबूया कोषाध्यक्ष विजय बज्राचार्यपाखें जुल । प्रस्तुत याये धुंनेवं हे उकियात छुं नं मयासें पास याना छ्वत । वयां लिपा मनूतय् उपस्थिति तसकं हे म्हो जुइ धुंकूगुलिं व ९ बजे बहनी नं जुइधुंकूगुलिं अध्यक्ष नरेश ताम्रकारं पेश यायेमाःगु विधान संशोधनया प्रस्ताव दर्ता वा टेबुल तकं मयासें उकुन्हुया उगु बन्द सत्र अथें हे बन्द जूवन ।

बन्द सत्रया निगूगु चरण कथं जिल्लां जिल्लां सहभागीतय्गु प्रतिवेदन न्ह्यब्वयेगु ज्या निर्धारित ई स्वयां लिपा सनिवाः ९ गते सुथय् जक जुल । न्हापांगु नेपालभाषा कक्ष कायेगु झ्वलय् जग्गा दान यानाः नीगु लाख तका फुकाः थःपिनिगु हे नेवाः छेँ धस्वाकेत ताःलागु मैदाने चमैताया गौरवया खँ कनेगु ज्या नेवाः देय् दबू इलामया अध्यक्ष युद्ध बैद्यं यानादिल । चुलाचुली भिंद्यः देगः, फिक्कल, मंगलबारे, पशुपतिनगर नापं छगू दर्जन थासय् जग्गा दान वःगु व स्वीगू गामय् संगठन बिस्तार जूवंगु खँ नं युद्ध बैद्यं न्ह्यब्वयादीगु इलाम जिल्लाया प्रतिवेदनय् दुथ्याकातःगु दु । 

सुनसरीया तीर्थराम मास्कें न्ह्यब्वयादीगु जिल्ला प्रतिवेदनय् ३४,००० जनसंख्या दुगु सुनसरीइ धरानय् जक १७ हजार दुगु व थःपिंथाय् २०७३ चैत २२ गते जिल्ला अधिवेशन क्वचाःगु खँ धयातःगु दु । नापं अन ३६ गू खलः पुचः सक्रिय जुयाच्वंगु नं न्ह्यथनातःगु दु । नेपालभाषा नापं नेवाः बाजं प्रशिक्षण नं न्ह्याकाच्वंगु दु । अथेहे पाँचथर जिल्लाया प्रतिवेदनय् निगू दशक न्ह्यः नीस्वंगु थः थिति पुचलं महाधिवेशन प्रतिधिनि जुयाः वये खनाः मनोबल थहाँवःगु खँ धयातःगु दु । थीथी जिल्लां प्रतिवेदन न्ह्यब्वयेगु ज्या जुयाच्वँच्वं हे ई म्हो जुया वनेवं निर्वाचन प्रक्रिया न्ह्यज्याकेगु ज्या जूवंगु खः । थ्वयां न्ह्यः नेवाः देय् दबूया नायः नरेश ताम्रकारं च्यादँ तक थः चाहे जुया जक अध्यक्ष पदय् च्वनाच्वनागु मखु धयादिसें येँय् जूगु भद्र सहमति दाङय् थ्यंकाः त्वादःगु खँ कनादिल । वय्कलं २०६५ साल चैत ९ गते धनकुटाय् नीस्वंगु नेवाः देय् दबूया न्याक्वःगु ज्यासना पुचः भंग जूगु घोषणा यानादिल ।

निन्हुकुन्हु जूगु बन्द सत्रय् नं महासचिव माइलाबाबु द्योलां स्थानीय निर्वाचनय् नेवाःत त्याकेगु निंतिं देय् न्यंकंया नेवाःतय्सं थः थःगु कथं भूमिका म्हितेत इनाप यानादिल । वय्कलं थीथी थासय् नेवाः उम्मेदवार थनेत व दंपिं नेवाःतय्त ग्वाहालि यायेत नं इनाप यानादीगु खः । वयां लिपा निर्वाचन प्रक्रिया सुरु जूवंगु खः । 

निर्वाचन प्रक्रिया

बन्द सत्रया निन्हुकुन्हु जिल्ला जिल्लाया प्रतिवेदन ब्वनेगु क्वमचाबलय् हे खुक्वःगु तःमुँज्याया निर्वाचन मण्डलं हस्तक्षेप हे यानाः निर्वाचन प्रक्रिया सुरु यायेमाःगु खँय् बः बिउगु खः । वयां लिपा धाःसा लिखित दुपिसं लिखित लःल्हायेत व लिपा हे जूसां उगु प्रतिवेदनयात लिखित रुपं बियाः देय् दबूया ज्याकुथिइ थ्यंकेत महासचिव माइलाबाबु द्योलां इनाप यानादीगु खः । वयां लिपा उगु हे माय्क निर्वाचन मण्डलया संयोजक अधिवक्ता जयकुमार श्रेष्ठया ल्हातय् लावन । वय्कलं बैशाख ९ गतेकुन्हु पूर्वनिर्धारित निर्वाचन समितिपाखें थःपिनि निर्वाचन प्रक्रियायात न्ह्याकेत प्रक्रिया सार्वजनिक यानादिल । 

निर्वाचन कार्यक्रम कथं २०७४ बैशाख ९ गते सुथय् ११ बजे प्रथम मतदाता नामाबली प्रकाशन, ११ बजेनिसें ११ः३० बजेतक उम्मेदवारतय् फारम वितरण व १२ः१५ बजे निसें १ बजे तक फारम भरे यायेगु, १२ः३० निसें १ः३० तक मनोनयन दर्ता, साधे २ बजे तक दावी बिरोध व साधे ३ बजेनिसें ४ बजे तक नां लित कायेगु ई क्वछित । अथेहे अन्तिम नामाबली प्रकाशनया ई ४ः३० बजे क्वछित । वयां लिपा ६ बजेनिसें ७ बजे तक मतदान यायेगु क्वछिउगु खः । 

अध्यक्ष पदय् पुलांम्ह अध्यक्ष नरेश ताम्रकार व पवित्र बज्राचार्य निम्हेसियां दावी जूगु खः । अथेहे उपाध्यक्ष पदय् ३ नम्बर प्रदेशय् जक बिजयरत्न बज्राचार्य, विजय प्रकाश तण्डुकार, उर्मिला डंगोल, चन्द्रलाल राजभण्डारी व रजनि महर्जनपिसं उम्मेदवारी ब्यूगुलि चन्द्रलाल राजभण्डरी निर्वाचित जुल । १, २, ४, ५, ६ व ७ नम्बर प्रदेशय् धाःसा छसिकथं कृष्ण उदास, शंकरराम श्रेष्ठ, शंकरनारायण श्रेष्ठ, दिपककुमार श्रेष्ठ, मिलन श्रेष्ठ व एककुमार श्रेष्ठपिं निर्विरोध रुपं निर्वाचित जुयादीगु खः । 

अथेहे प्रदेश ३ य् जूगु खुल्ला सदस्य पदय् हरिकुमार श्रेष्ठं ४१ मत हया त्याकूगु खः । प्रदेश नम्बर १, २, ४, ५, ६ व ७ य् धाःसा छसिकथं कमल श्रेष्ठ, घनश्याम श्रेष्ठ, देवेन्द्रकुमार श्रेष्ठ, त्रिरत्नलाल शाक्य, खगेन्द्रबहादुर श्रेष्ठ व विकास श्रेष्ठपिं निर्विरोध रुपं क्षेत्रीय सदस्य निर्वाचित जुयादीगु खः । खुल्ला सदस्य महिला पदय् यशोधादेवी श्रेष्ठं दक्कलय् अप्वः मत २६३ कयाः प्रथम विजय जुयादिल । नापं मिसा खुल्लापाखें निर्मला श्रेष्ठ, लक्ष्मी शाक्य, सीता श्रेष्ठ, रश्मिला प्रजापति व सुन्दरी श्रेष्ठपिं निर्वाचित जुयादीगु खः । खुल्लापाखें हे माइलाबाबु द्योलां दक्कलय् अप्वः २४८ मत हयाः प्रथम विजयी जुयादिल । नापं खुल्लापाखें शान्त श्रेष्ठ, बसन्ता श्रेष्ठ, सत्यनारायण डंगोल, अनिल मास्के व महेन्द्र लिगल निर्वाचित जुयादीगु खः । अध्यक्ष पदय् पुलांम्ह अध्यक्ष नरेश ताम्रकार हे १९६ मत हयाः विजयी जुयादीगु खः । वय्कःया छम्हयां छम्ह जक प्रतिद्धन्दि पवित्र बज्राचार्यं १५० मत कयादीगु खः । मुक्कं ४०५ म्ह मतदाता दुथ्याःगु उगु चुनावं नायः नरेश ताम्रकार व महासचिव माइलाबाबु द्योला बाहेक फुक्कं हे न्हूपिं ल्यःगु दु । 

चान्हे १० बजे तक न्ह्याना मतदान क्वचाःगु खःसां थीथी कथंया सहमति ल्यं दनिगु जुयाः मतगणता ढिला जूवंगु खः । करिब २ बजे चान्हय् निसें सुरु यानाः सुथय् ७ बजेपाखें मतगणना क्वचाल । वयां लिपा जूगु बधाई ज्याझ्वः व घोषणा सभाय् नेवाः देय् दबूया संरक्षक मल्ल के. सुन्दरं येँय् सहमति याना वयागु चीज दाङय् त्वाःदगुलिं थःत सत्यमोहन जोशी व दुर्गालाल श्रेष्ठ थेंज्याःपिं राष्ट्रिय स्तरया ब्यक्तित्वतय् न्ह्यःने ख्वाः क्यनेत तकं मछालापुसे च्वनीगु जुल धकाः न्ववानादिल । 

विजय जुइवं हे नायः पदया उम्मेदवारपिं निम्ह नरेश ताम्रकार व पवित्र बज्राचार्य नापं च्वनाः किपा कायेगु ज्या जूगु खः । वयां लिपा विजयी उम्मेदवारपिंत निर्वाचन आयोगया अध्यक्ष जयकुमार श्रेष्ठं दसि पौ इनेगु व शपथ ग्रहण याकेगु ज्या जुल । थुकथं २०६५ साल चैत ९ गते नीस्वंगु न्याक्वःगु देय् दबूया कार्यसमिति २०६९ साल असोज ६, ७ व ८ गते आनन्दकुटी बिहारय् स्थगन जूगु खुक्वःगु महाधिवेशनं ल्यये मफुसां थुगुसी २०७४ सालया बैशाख ८, ९ व १० गते तकं जूगु दाङया खुक्वःगु महाधिवेशनं धाःसा ल्ययाः हे त्वतल ।  

नेवाः देय् दबूया निंतिं राय्पोट : कृष्ण प्रजापति

 

 

 

 

Upcoming Programs

नेपालभाषा प्रशिक्षण कार्यक्रम, देशका विभिन्न १० स्थानहरुमा