Get Adobe Flash player

बिब्ल्याँटेय् इलामय् न्ह्यानाच्वंगु नेपालभाषा कक्षा

इलाम सदरमुकामं ५ किलोमिटर जक उत्तर पश्चिम लागाय् लाःगु छगू न्हूगु बस्ती खः बिब्ल्याँटे । थ्व बरबोटे गाविस अन्तर्गत ३ वडाय् लाःगु थाय् खः । थन थौं स्वया न्यय्दँति न्ह्यः जक पाँचथरं वःम्ह छम्ह नेवाः पद्मबहादुर श्रेष्ठं अनया घनघोर जंगल व सिगाः छ्यानाः बस्ती योग्य दयेकूगु खः । मेची राजमार्ग चले जुइ धुंका २०३४/३५ साल लिपा थ्व थाय् इलामं राँके जुयाः फिडिम व ताप्लेजुङ वनेगु छगू ट्रान्जित प्वाइन्ट कथं प्रसिद्ध जुजुं वन । उखे वनीगु फुक्कं हे गाडी थन जुयाः वनेमाःगुलिं थ्व थाय् स्वये चिधंगु थाय् खःसां आः नमूना बजार कथं नांजाःगु थाय् जुयाच्वंगु दु । गन बाहुन, क्षेत्री, तामाङ, नेवाः, राई, लिम्बु नापं थीथी जातिया मनूत वया च्वनाच्वंगु दु । नेवाःतय् ल्याः ख्वीखाति दु । खास याना तोरीबारी, डाँडागाउँ व भर्लेनीया नेवाःतय् नं संगम स्थल जूगु ल्याखं थ्व थासय् च्वंपिं नेवाःतय् कि भर्लेनीइ, कि तोरीबारीइ कि मखुसा डाँडागाउँ लागाय् थःपिनि जग्गा जमीन धाःसा आः नं दनि । सुथय् ४÷५ बजे हे दना बजार चायेकेत वइपिं स्थानीय नेवाःत बहनी ७÷८ बजे तक नं थन ब्यापार ब्यवसाय यायेधुंकाः थःपिनि कूल छेँय् लिहाँ वनी । थ्व उमिगु दिनचर्या खः । अथे जुयाः थन भाषा, जाति, व संस्कृतिया खँ ल्हाइपिं दु । तर कक्षा धाःसा न्हापांखुसि थुगुुसी हे जक चले यायेफुगु स्थिति दु । नेवाः देय् दबू केन्द्रीय समितिया आह्वान कथं थन थ्यंकावंम्ह कृष्ण प्रजापतिं थन नेवाः जातिं ल्हानाच्वंगु मौलिक भाषा नेपालभाषा व नेपाःया मौलिक लिपि न्हापांखुसि थन च्वनाः स्यनाच्वंगु दु । आः थनया कक्षा क्वचायेकाः झापा लिक्क लाःगु इलामया गां साफारा धाःथाय् मेगु कक्षाया लागिं जिल्लां तयारी यानाच्वंगु दु । बिचाः हे मयानाथें भाषा कक्षा सञ्चालन जूगु जुयाः घौछि न्यासि वयेमाःगु तोरीबारीनिसें कुमार नेवाः गुभाजु, राम, कृष्ण नापं मेपिं न्याम्ह पासापिं बिब्ल्याँटेय् वया हे भाषा सयेकाच्वंगु दु । उमिगु उत्सुकतां प्रशिक्षक नं प्रभावित जुयाच्वंगु दु ।

ल्याय्म्ह पुस्ता जक मखु कि थन प्रौढ बैसय् थ्यनेधुंकूपिं गीता श्रेष्ठ, सीता श्रेष्ठ, नारायणबहादुर श्रेष्ठ, चन्द्र श्रेष्ठ नापं आपालं न्यय्दँ पुले धुंकूपिं नेवाःत नं थःपिनि मौलिक भाषा नेपालभाषा सयेके दुसा जिउ धइगु मनसाय सहित कक्षाय् सहभागी जुयाच्वंगु दु । अन प्यंगु कक्षाय् यानाः चय्म्हति सहभागी दुगुलि आः भर्लेनी व डाँडागाउँ लागाया कक्षायात बिब्ल्याँतय् हे ल्ययेधुंकाः धाःसा छुं भचा ब्वंमिपिनि ल्याः म्हो जूवंगु दु । अथे खःसां थन स्थानीय ल्याय्म्ह ल्यासेत धाःसा तसकं उत्सुक जुयाः थःपिंत माःगु व ज्या वःगु चीजयात कुतु कुला न्यनाः शिक्षक कृष्ण प्रजापतियात समाधानया उपचार मालाच्वंगु दु । गब्लें ‘आई लभ यू’ धायेत झीगु भासं छु धायेगु सर धकाः न्यनी । जब सरं ‘जिं छंत मतिना याना’ धकाः बाध्य जुयाः कक्षाय् सकसियां न्ह्यःने उच्चारण यानाक्यनी । ‘सेम टु यू सर’ धकाः हायेके धुंकी । 

येँया बालाजुइ दँ दँ तक च्वनाः प्लस टु कक्षा क्वचायेके धुंकाः स्नातक ब्वने न्ह्यः जागिर निं स्वयेत छेँय् लिहाँ वयाच्वंपिं मय्जुपिं प्रतिभा श्रेष्ठ व नविना श्रेष्ठं ला सरयात हायेके थें धाये हे धुंकी । ‘छोरो कत्रो छ ? हामीलाई ठिक्क भए, रक्सी लिएर घरमा पाल्नुस् ।’ लिम्बु लागाय् नेवाः, तामाङ, राई, बाहुन क्षेत्री वा न्ह्यागु हे जातिइ नं म्ह्याय्मचा क्वछिनेत अय्ला ज्वनाः मां अबु वा सतीपिं अभिभावकत छेँय् वयेगु चलन दु । पूर्वाञ्चलय् अप्वः धइथें म्ह्याय्मचात पुचः पुचः मुनाः ल्याय्म्ह मनू खनेवं हे हायेकेगु, गनं वनेगु धायेगु वा हेवाय् चवाय् यायेगु चलन ताः ई न्ह्यःनिसें चलन चल्तीइ वये धुंकूगु दु । थ्व बिब्ल्याँटे बजार लागाय् नं मिस्त हे न्ह्यागु नं ज्याय् तल्लीन । म्हो जक स्थानीय ल्याय्म्हत थःगु थासय् च्वनाः ज्या यानाच्वंगु जुयाः थन मिस्तय् ल्याः नं मिजंत स्वया भचा अप्वः हे दु । 

कक्षाया झ्वलय् विद्यार्थीतय्गु हे इनापय् अनं स्वघौ न्यासि वनेमाःगु माई पोखरीया प्राकृतिक दृश्यावलोकनय् वनेगु ज्या नं जुल । वंगु बैशाख २५ गते उपप्रधानमन्त्री तथा संघीय ब्यवस्था मन्त्री प्रकाशमान सिंह श्रेष्ठया ल्हातिं उलेज्या याःगु इलाम नगरपालिका दुनेया चियावारी लागाय् न्हूगु दयेकूगु भ्यू टावर तक भ्रमण वनेगु ज्या नं जुल । नापं माई खोलाय् जूवनिगु भलेर्नी खुसिइ वनाः अनया प्राकृतिक सुन्दरताया दृश्यावलोक यायेगु ज्या नं जुल । थुकथं कक्षा चले जुयाच्वंगु हे झ्वलय् राँके बजार मिनःगु व इलामं येँय् वनाच्वंगु 

मेट्रो डिलक्सया बस दुर्घटना जुयाः आपालं बांबांलाक ब्वनाच्वंपिं इलाम नगरपालिका व जःखःया निगू दर्जन मनूत सिवं थन शोकाकूल ला जूगु खः । तर कक्षायात व थःगु ब्यवसाययात नं उलि हे बांलाक ध्यान तयाच्वनीम्ह स्थानीय नेवाः देय् दबूया नायः बालकुमार श्रेष्ठया अध्यक्षताय् चले जुयाच्वंगु स्थानीय नेवाः संगठनं २ गते बैठक च्वनाः आः याकनं कक्षा तालाक क्वचाःगुलि थीथी राजनीतिक पार्टीया प्रधिनिधि व गाविसया प्रतिनिधि सःता सुभाय् बियेगु क्वछिनातःगु दु ।

-कृष्ण प्रजापति