Get Adobe Flash player

नेवाः देय् दबूया बुन्हि हनेत मूल समारोह समिति गठन

नेवाःतय् राष्ट्रिय संगठन नेवाः देय् दबूया बुन्हि हनेत थौं छगू सहलह मुँज्या जुल । देय् दबूया थःगु हे भवन ताम्सिपाखाय् थीथी जातीय संगठनया प्रतिनिधिपिनिगु दथुइ बुन्हि हनेगु विषययात कयाः सहलह जूगु खः । 
उगु सहलह मुँज्यां थुगुसी देय् दबूया बुन्हि हनेत छगू मूल समारोह समिति नीस्वंगु दु । देय् दबुलिइ आवद्ध दक्वं जातीय संगठनया नायः व सहलह मुँज्याय् उपस्थित जुयादीपि जातीय संगठन नापं खलः, पुचःया प्रतिनिधिपिं दुथ्याकाः मूल समारोह समिति गठन जुल । 
देय् दबूया बुन्हि थ्व हे वइगु ञलाथ्व सप्तमि, विहीवाः कुन्हु छगू विशेष ज्याझ्वःया दथुइ हनेत्यंनागु जुल। थुगुसी देय् दबूया नीनिक्वःगु बुन्हि कुन्हु नेपालभाषाया माध्यमं आखः ब्वंका वयाच्वंगु ब्वनेकुथियात हनेगु जुइ । उकिया निंतिं दीपक तुलाधरया संयोजकत्वय् माया मानन्धर व रेणुका वज्राचार्य दुथ्याःगु छगू कमिटी गठन यायेगु झया जुलसा प्रचार प्रसारया संयोजनया भाला नेवाः पत्रकार राष्ट्रिय दबू अथे हे प्रचार प्रसार कमिटीइ दानदास श्रेष्ठ व अमिररत्न ताम्राकार नं च्वनादीगु दु ।
थुकथं हे सविता मुनिकारया संयोजनय् नानी महर्जन, गिता प्रजापति व रश्मिला प्रजापति दुथ्याःगु सांस्कृतिक उपसमिति, मंच व्यवस्थापनया भाला शरण गोपाल डंगोल व स्वयमसेवकया भाला सत्यनारायण डंगोलयात बिइगु ज्या जुल। 
खाद्य व्यवस्थापनया भाला नेवाः देय् दबू येँ जिल्ला कचा व बुन्हि ज्याझ्वः स्वयां न्ह्यः नखःचखः सम्बन्धय् छगू गोष्ठि यायेत दैवज्ञ कीर्तिमदन जोशीया संयोजकत्वय् दानदास श्रेष्ठ, सन्तु महर्जन, मदन तण्डुकार दुथ्याःगु छगू कमिटी गठन जुल । देय् दबूया बुन्हि हनेगु सम्बन्धय् जूगु सहलह मुँज्याय् झायादीपिं प्रतिनिधिपिंसं थीथी कथंया ज्याझ्वः याना वनेगु नापं देय् दबूया ज्याझ्वःयात अपनत्व महसुस याये फइकथंया ज्याझ्वः पित बीमाःगु खँय् सुझाव बियािदइगु खः ।