Get Adobe Flash player

नेवाः देय् दबूया नीनिक्वःगु बुदिंहना ज्याझ्वः तःजिक क्वचाल

हनेबहम्ह संस्कृतिविद् सत्यमोहन जोशीं नेवाः देय् दबूया लोगोय् नीनिगः यःमरि क्वखायेकुसें दबूया नीनिदँ बुन्हि ज्याझ्वः उलेज्या यानादिइगु खः । नेपाःया राष्ट्रिय म्येँ व नेवाः देय् दबूया म्येँ हायेकाः सुरु जूगु ज्याझ्वलय् मेपिं पाहाँपिंसं नीनिप्याः हे सुकुन्दा च्याकाः ज्याझ्वःया उलेज्या यानादीगु खः ।

ज्याझ्वलय् ख्वनाया लिधंसा पासा पुचःयात समाजसेवा विधापाखे नारायणदेवी–तीर्थ सिरपाः, जगतसुन्दर ब्वनेकुथियात व्यावसायिक प्रोत्साहन सिरपाः, प्रा नर्मदेश्वर प्रधानयात ठाकुरलाल सिरपाः व यल नेवाः ई स्कुलयात ठाकुरलाल हःपाः सिरपाः नं लःल्हायेगु ज्या जुल । नारायणदेवी–तीर्थ सिरपाः, व्यावसायिक प्रोत्साहिन सिरपाः व ठाकुरलाल सिरपाः छगू छगू लाख तका व सम्मानपत्र सहितया खःसा ठाकुरलाल हःपाः सिरपाः न्ययद्वः तका व सम्मानपत्र सहितया खः ।

अथेहे ज्याझ्वलय् देय् दबूया ग्वसालय् नेपाःया थीथी थासय् वनाः नेपालभाषा, लिपि, बाजं, बाँसुरी, हुलाप्याखं स्यंवंपिं स्यनामिपिंत नं हंगु खःसा नेपालभाषा माध्यमं ब्वंकीगु ब्वनेकुथियातनं हनेगु ज्या जूगु खः । 

ज्याझ्वलय् थीथी हुलाप्याखं लिसें लिधंसा पासा पुचःपाखें धिमेप्याखं नं न्ह्यब्वःगु खः । अथेहे बुदिंया अवसरय् लोककवि राजभाइ जकःमिं च्वयादिइगु नेवाः देय् दबूया म्ये सार्वजनिक यायेगु ज्या नं जुल ।