Get Adobe Flash player

देय्या थीथी थासय् न्हूदँ तःजिक हन

नेवाः देय् दबूया थीथी जिल्ला, नगर, गाउँ व प्रारम्भिक समिति, खलःपुचः, संस्थापाखें “नेपाल सम्वत् ११३७ न्हूदँया भिन्तुना सांस्कृतिक सम्वर्द्धन झीगु तातुना” धैगु मूल नारा थ्वय्का न्हूदँ हनेज्याझ्वः जुल । पूर्वया ताप्लेजुङ निसें पश्चिमया कञ्चनपुरतक थीथी ज्याझ्वःयासें न्हूदँ हनेज्या जूगु खः ।

झापा

नेवाः देय् दबू जिल्ला समिति झापाया समन्वय्स झापा दक्वः खलःपुचःपाखें  थीथी ज्याझ्वःयासें नेपाल सम्वत् ११३७ न्हूदँ तःजिक हन । नेवाः देय् दबू विर्तामोडया ग्वसालय् अनया थीथी नेवाः समुदाय् नापं मेमेपिं जनजाति समुदाय नापं दुथ्याकाः सांस्कृतिक र्याली व भिन्तुना कलविल ज्याझ्वः याःगु खः । अथेहे नेवाः देय् दबू भद्रपुर, नेवाः देय् दबू काँकरभिट्टा, नेवाः देय् दबू सुरुङ्गाय् नं न्हूदँ र्याली व भिन्तुना कालविल ज्याझ्वः या?गु खः । थुकथं हे जिल्लाया मेमेगु खलःपुचःपाखें मोटरसाइकल र्याली, बिचाः गोष्ठी, चियापान ज्याझ्वः जूगु नेवाः देय् दबू जिल्ला समिति झापां जानकारी बियादिइगु खः ।

सुर्खेत

नेवाः देय् दबू जिल्ला समिति सुर्खेतया ग्वसालय् अन न्हूदँ मोटरसाइकल र्याली ज्याझ्वः जुल । समितिया नायः जीवनकुमार शाक्यया नायःसुइ न्ह्याःगु मोटरसाइकल र्याली सुर्खेत बजार परिक्रमा यासें कोणसभायाना भिन्तुना कालविल यायेगु ज्या जुल ।

ताप्लेजुङ 

नेवाः देय् दबू ताप्लेजुङ(नेपालभाषा तथा सांस्कृतिक समाज)या ग्वसालय् सांस्कृतिक र्याली व भिन्तुना कालविल ज्याझ्वः जुल । नायः निरोज श्रेष्ठया नायःसुइ न्ह्याःगु उगु ज्याझ्वलय् न्हापां नेवाः वसःपुनां पिहाँवःगु सांस्कृतिक र्यालीं फुङलिङ बजार परिक्रमा याना आनया भिन्तुना चोकय् कोणसभायासें न्हूदँ हनेज्या जूगु खः । ज्याझ्वलय् धिमे प्याखँ व धिमे ब्वज्या तकं याःगु खः ।