Get Adobe Flash player

नेवाः देय् दबूया थीथी समिति नीस्वन

वंगु शनिवा (ने.सं. ११३८ गुंलागा आमाइ) कुन्हु विरगंज पर्साय् भाजु गजेन्द्र देव थकूया नायःसुइ जूगु जिल्ला भेलां भाजु सन्दर श्रेष्ठया नायःसुइ १९ म्हसिया नेवाः देय् दबू पर्सा जिल्ला तदर्थ समिति नीस्वंगु दु । देय् दबूया नायः नरेश कुमार ताम्रकारं मूपाहाँ कथं ब्वति कयादिइगु खःसा केन्द्रिीय सल्लाहकार भाजु डा. दिपक शाक्य, केन्द्रीय न्वकू भाजु चन्द्रलाल राजभण्डारीं पाहाँ कथं ब्वति कासें भेलाय् थःथःगु न्वचू तयादिइगु खः । अथेहे उगु भेलां भाजु रुपेश मानन्धरयात छ्याञ्जे व भाजु सुनिल जोशीयात दांभरि ल्यंगु दुसा वइगु खुला दुने जिल्ला अधिवेशन याना पूर्ण समिति दयेकेगु व जिल्लाया दक्वः नगरपालिका, गाउँपालिका, वडातकं संगठन दयेकाः नेवाःतय्त छप्पं याना नेवाः भाषा, संस्कृतिया उत्थानया नितिं ज्या यायेगु क्वछ्यूगु दु ।

अथेहे शनिवाः कुन्हु हे तनहू जिल्लाया भानू नगरपालिकाय् जूगु नगर भेलाय् भाजु निलम संजिवा श्रेष्ठया नायःसुइ १५ सदस्यीय नेवाः देय् दबू भानु नगर समिति नीस्वंगु दु । भाजु निलम संजिवा श्रेष्ठया नायःसुइ जूगू उगु ज्याझ्वलय् केन्द्रीय न्वकू भाजु शंकर नारायण श्रेष्ठं मूपाहाँ कथं ब्वति कयादिइगु खः । नापं उगु भेलां भाजु गणेशमान श्रेष्ठ व मय्जु विष्णु कुमारी श्रेष्ठयात न्वकू, भाजु सनिल श्रेष्ठयात छ्याञ्जे, भाजु असिम श्रेष्ठयात ल्यूछ्याञ्जे व मय्जु सुष्मा श्रेष्ठयात दांभरि, भाजु हर्कमान श्रेष्ठयात ल्यू दांभरि ल्यःगु खः । 
अथेहे विराटनगरय् नं वंगु शनिवाः कुन्हु हे भाजु भक्त सैंजुया नायःसुइ नेवाः देय् दबू विराटनगर महानगरपालिका १ नं वडा समिति नीस्वंगु दु । भाजु भक्त संैजुया नायःसुइ जूगु भेलाय् केन्द्रीय दुजः भाजु जयकुमार श्रेष्ठ मूपाहाँ कथं ब्वति कयादिइगु खःसा नेवाः देय् दबू मोरङ्ग जिल्ला समिति नायः भाजु सुरेश कुमार श्रेष्ठ, महानगर समिति नायः भाजु मोहन प्रसाद श्रेष्ठं पाहाँकथं भेलायात सम्बोधन यानादिइगु खः । अथेहे समितिया न्वकूलय् मय्जु शोभा श्रेष्ठ, छ्याञ्जे उमेश श्रेष्ठ, दांभरि बविता श्रेष्ठ सहित ९ म्हसित न्हू समितिया दुजलय् ल्यःगु खः ।