Get Adobe Flash player

ठाकुरलाल सिरपाः

 

सिरपाः या नां

ठाकुरलाल सिरपाः

सिरपाः म्हसीका

नेपालभाषा साहित्य ख्यलय् छम्ह नां जाःम्ह च्वमि अले अन्वेषक भाजु ठाकुरलाल मानन्धरया सतबार्षिक जन्म दिंया अवसरय् वयकःया हे नामं वयकःया काय् भाजु मांभाय्या छम्ह अनन्य सेवक, प्रेरक ब्यक्तित्व भाजु गिरिधरलाल मानन्धरजुं नेपालभाषा व नेपालभाषा साहित्य ख्यलय् मुवंगु योगदान वियादिइम्ह व्यक्ति वा संस्थायात देछायेगु कथं थ्व ठाकुरलाल सिरपाः नीस्वनादिइगु खः ।

ठाकुरलाल मानन्धर म्हसीका

ने.सं.१०३२ यंलाथ्व दुतिया कुन्हु येँया गणबहालय् बौ रत्नलाल मानन्धर व मां जगतमाया मानन्धरया कोखँ जन्म जुयादिम्ह भाजु ठाकुरलाल मानन्धर नेपालभाषा साहित्य ख्यलय् जक मखु देश विदेशय् विभिन्न विश्वविद्यालय वनां नेपालभाषा व नेपाःया इतिहास, कला, संस्कृति सम्बन्धि अध्ययन अनुसन्धान याना वंम्ह नांजाम्ह च्वमि व अन्वेषक ब्वक्तित्व खः । नेपालभाषा व नेपाःया इतिहासया अध्यया अनुसन्धानया झ्वलय् त्रिभुवन विश्वविद्यालयया नेपाल तथा एशियाली अध्ययन केन्द्र CINAS वय्कलं नेपालभाषा, नेपाली भाष नापं अंग्रेजी भाषां तकं च्वसु च्वयेगु, सफू च्वयेगु थीथी अनुसन्धानात्मक च्वसु रोयल नेपाल ऐकेदमी लगायत बेलायत, जर्मन, फ्रान्स, इटाली, स्वीटजरल्याण्ड,  स्वीडेन आदि देशय् वनां ज्या यानादिइगु दु ।

झीगु मांभाय्, साहित्य व संस्कृति विषयक अध्ययन, अन्वेषण व अनुसन्धान याःवइपिं पाश्चात्य देश युरोपया नांजापिं थीथी अनुसन्धाता विद्वान, विदुषीपिन्त माःकथं माःगु लँ क्यनाः खँथ्वीकाः स्येनेकने याना अन्तराष्ट्रिय ख्यलय् थ्यंक झीगु मांभाय्, साहित्य व संस्कृति प्रचार प्रसार यायेगु ज्याय् ज्यःमदुगु भुमिका म्हितादिइगु दु । थ्व हे झ्वलय् नेपाःया इतिहास विषयसं फ्रान्सया विद्वान Sylvian Liviया Paris University या Prof.Filiojaया निमन्त्रणाय् Parisवनां नेपालभाषा प्रवचन बिया नेपालभाषाया कोष Newar-English Dictionary Modern Language of Kathmandu Valley युनिभर्सिटि पाखें हे छापे याकादिल । अथेहे स्वीडेनया Stockholm University सं च्वना Prof.Lienhardनाप जाना नेपालं युरोप यंका तःगु आपालं  बहुमुल्य Manuscriptअभिलेखया पूर्ण अध्ययन याना अत्यन्त उपयोगी Catalogue of Newari Manuscript पिथनादिल ।

नेपालभाषा परिषदया संस्थापक दुजःजुयादिइम्ह वय्कः भाजु भाषा जवाः थें जाःगु सम्मानीत उपाधि नं सम्मानीत जुयादिइम्ह खः । नेपालभाषा साहित्य ख्यलय् कवि सिद्धिचरण श्रेष्ठ, चित्तधर हृदय, पूर्णदास श्रेष्ठ, सत्यमोहनजोशीया समकालीन भाजु ठाकुरलाल मानन्धरया भाजुनिवन्ध अतिकं हे ल्वकंह्वाःगु कृति खः । थ्व नापनापं वय्कः कृति नेपाल संगीत, च्वमि चित्तधर हृदय अथेहे पुंलागु म्ये, पर्यायवाची शव्दकोष, नेपाल ऋतुपौ सम्पादन नापं भाषा, संस्कृति व दर्शनया आपालं च्वसूत नेपाःया धर्मोदय, झी व अन्तराष्ट्रिय पत्रपत्रिकाय् प्रकाशित जुगु दु ।

सिरपाः बिइगु क्षेत्र

नेपालभाषा वा नेपालभाषा साहित्य

सिरपाःया निम्ति नां दुतिनेगु प्रकृया

सिरपाःया नितिं गुगुनं संघ/संस्था/खलः/पुचः/गुथि/व्यक्ति आदिं नेपालभाषा वा नेपालभाषा साहित्य ख्यलय् च्वछायेबहःगु योगदान बियावयाच्वंगु खः धैगु आधिकारिक पुष्टि सहित नेवाः देय् दबूया दुजः/खलः/पुचः/संघ/संस्था/कचापाखें सिफारिस जुयावःगु जुइमा तर छगू जक संस्था दुगु जिल्ला जुसा नेपाल आदिवासी जनजाति महासंघया सम्बन्धित जिल्ला समन्वय् समिति वा मेमेगु सामाजिक संस्थापाखें सिफारिस याःगु जुइमा ।

·         सिरपाःया सिफारिसया नितिं नेवा देय् दबूपाखें बुदिंया निला न्ह्यः सार्वजनिक आव्हान याइ ।

सिरपाःया राशी व लःल्हायेगु दिं

दँय्दसं नेवा देय् दबूया बुदिं ञंलाथ्व सप्तमी कुन्हु नेपालभाषा वा नेपालभाषा साहित्य ख्यलय् च्वछायेबहःगु योगदान बियावयाच्वंगु संघ/संस्था/खलः/पुचः/गुथि/व्यक्ति आदियात हनापौ सहित दां छगू लाख तका (१,००,०००।००) लःल्हायेगु जुइ ।

सिरपाःनिर्णायक समिति

 नायः        - हनेबहःम्ह सत्यमोहन जोशी, पुलाम्ह चान्सलर नेपालभाषा एकेडेमि

            सदस्य सचिव - नरेश ताम्रकार, नायः नेवाः देय दबू
दुजः        ‍- ..........................................., दाता
दुजः        - डा.पुष्पराज राजकर्णिकार, सल्लाहकार नेवाः देय् दबू
 दुजः        - डा. सुमित्रा मानन्धर, सल्लाहकार नेवाः देय् दबू 
 दुजः        - शारदा बैद्य, समाजसेवी, पोखरा
 दुजः        - कुशकुमार जोशी, पूर्व अध्यक्ष नेपाल उद्योग बाणिज्य महासंघ
 दुजः        - बालकृष्ण हलवाई भाषासेवी, धरान
दुजः        - पद्मासना शाक्य, संस्थापक माणषि

   सिरपाः ११३२ दँय् प्राप्त याःगु संस्था व ब्यक्ति

नेपालभाषा ऐकेदमी (नेवाः एफ.एम.) किपू, येँ

संचारया ख्यलय् नेपालभाषा माध्यमं समाचार प्रसारण यायेगु,  नेवाः म्ये, संगीत, साहित्यया ज्याझ्व न्ह्याका झीगु सःयात हिलन्यंक थ्वयेकाः नेपालभाषा ख्यःयात चकंकेगु ज्याय् मूवंगु योगदान वियादिइगु नेवाः एफ एम.यात ने.सं.११३२ या ठाकुरलाल सिरपाः लःल्हागु खः ।

सिरपाः ११३४ दँय् प्राप्त याःगु संस्था व ब्यक्ति

 नेवाः बस्ती नेवाः स्कूल अभियान, दिपक तुलाधर, येँ,

नेवाः बस्ती नेवाः अभियान छगू थुज्वःगु अभियान खः गुकिं नेवाः मस्तय्त मांभाषं शिक्षा वियेगु हे कालान्तर तक नेवाः भाय्,कला, संस्कृति, लिपि आदिया संरक्षण व विकास याना यंकेगु सहि माध्यम तायेका प्रभावकारी शिक्षा व मांभाय्या संरक्षणया नितिं थुगु अभियानया अभियन्ता भाजु दिपक तुलाधरं थःगु हे व्यक्तिगत प्रयासं दरवारमार्ग यें मोर्डन नेवाः स्कूल चायेका मांभाषं शिक्षा बिइगु प्रशंसनीय ज्या न्ह्याकादिइगु खः। थुलिहे जक सिमित मजूसें नेपाःया विभिन्न स्थानया नेवाः बस्ती थाय् थासय् नेवाः स्कूल चायेकेत प्ररित यासें माःगु ग्वाहालि यायां दर्जनौं स्कूलय् नेवाः भाषां आवश्यक पाठ्यक्रम व पाठ्यपुस्तक दयेका: पठनपाठन ज्या न्ह्याना च्वंगु दु ।