बागमती प्रदेश सरकार संस्कृति तथा पर्यटन मन्त्रालयया सहकार्यय् नेवाः देय् दबूया ग्वसालय् निन्हुयंकं न्ह्याःगु नेपालभाषा मानकीकरण गोष्ठी व नेपालभाषा भेद दुगु क्षेत्रया संघसंस्था दथ्वी अन्तरक्रिया ज्याझ्वः क्वचाल । वंगु तलाथ्व त्रयोदशि व चःहे निन्हुयंकं काभ्रेया पन्तिच्वंगु डायमण्ड हिल रिसोर्टय् न्ह्याःगु गोष्ठी पुचः सहलह व मूति पिकासे क्वचाःगु खः ।
निन्हुया दिं कुन्हु नेपालभाषा लेखन प्रणाली, नेपालभाषा लेखन वर्तमान अवस्था व समस्या व बागमति प्रदेशस्तरय् नेपालभाषाया मानकीकरण प्रक्रिया, लँपु व सुझाव विषयय् स्वंगू पुचलय् सहलह याःगु खः ।
सहलहय् भाषा आयोगया माननीय सुरेश किरण मानन्धर, डा. पुष्पराज राजकर्णिकार व महेन्द्रगोपाल कर्माचार्य सहजकर्ता जुयादीगु खः ।
पुचः सहलहपाखें व्वलंगु निष्कर्षयात कयाः शरद कसाः, जीवनकुमार महर्जन व विष्णु चित्रकारं प्रस्तुति बियादीगु खःसा स्वम्हं सहजकर्ता नं सहलहया विषयय् खँ तयादीगु खः ।
सहलहकथं बागमति प्रदेश सरकारं प्रदेशस्तरीय कामकाजी भाय्या रुपय् गुगु मान्यता बिल उकी मानकीकरणकथं आःयात लिपिया सन्दर्भय् रञ्जना लिपि महत्वपूर्ण थासय् जक छ्यलेगु, प्रचलित लिपि देवनागरि नापनापं छ्यलेगु, लेखन प्रणाली दुगुलिं भाषिक भेद छ्यलेगु, लेखन परम्परा मदुगुलिइ शिक्षा, संचारय् लेखन प्रणाली न्ह्याकेगु, स्थानीय तहय् भाषिक भेद छ्यलेगु, बहमुतं छ्यला वयाच्वंगु ब्याकरण हे छ्यलेगु, भाषा प्रवद्र्धनया निंतिं मेमेगु शीर्षकय् थें बजेट व्यवस्था याकेगु लगायतया निष्कर्ष सहलहपाखें पिकाःगु खः ।
गोष्ठीया लिपांंगु ब्वय् नेपालभाषा केन्द्रीय विभागया प्रमुख सह प्रा.डा. राजनलाल जोशी, बागमति प्रदेशया सांसद, पुलांम्ह मन्त्री शैलेन्द्रमान वज्राचार्य व देय् दबूया नायः पवित्र वज्राचार्यं नुगःखँ तयादीगु खः ।
थ्व स्वयां न्ह्यः गोष्ठीया न्हापांगु दिं नेपालभाषा केन्द्रीय विभागया पुलांम्ह प्रमुख सह प्रा. डा. राजनलाल जोशी नेपालभाषा मानकीकरण व पुलांम्ह प्रमुख प्रा. डा. ओमकारेश्वर श्रेष्ठं भाषिक भेद विषयय् ज्यापौ न्ह्यब्वयादीगु खः ।
अथे हे नेवाःतय् ख्वातुगु वसोवास दयाच्वंगु, वादे, ख्वना, पन्ति, द्वाल्खा, ख्वप, थिमि, धादिङ, सिन्धुली आदि थासं झायादीपिं प्रतिनिधिपिंसं थःथःगु लागाय् भाषिक भेदया अवस्था बारे कनादीगु खः । (उदेन न्हूसाय्मि)