नेवाः देय् दबूया ३१ क्वःगु बुसादँया लसताय् केन्द्रपाखें येँ विनायक मल्टीभेन्यू छगू ज्याझ्वः यासें तःजिक हनेगु ज्या जुल। संरक्षक मल्ल के सुन्दरया मूपाहाँसुइ जुइगु उगु ज्याझ्वलय् बागमती प्रदेश सरकारया नवनियुक्त जुयादीपिं सामाजिक विकास मन्त्री मा.कञ्चन चन्द्र बादे, उद्योग, वाणिज्य तथा भूमी व्यवस्था मन्त्री मा. विन्दु श्रेष्ठयात बधार्इ व सफल कार्यकालया भिंतुना देछायेगु ज्याझ्वः जुल । ज्याझ्वलय् संरक्षक नरेश कुमार ताम्रकार, सल्लाहकारपिं डा. पुष्पराज राजकर्णिकार, सल्लाहकार राजेन्द्र श्रेष्ठ, सल्लाहकार महेशमान श्रेष्ठं पाहाँकथं ब्वति कयादीगु खः । अथेहे नेपालभाषा, साहित्य ख्यलय् योगदान यानादीपिं साहित्यकार, भाषासेवी लगायत थीथी खलः पुचः व नेवाः देय् दबूया स्वनिगः, यें, यल, ख्वप जिल्लाया थीथीसमितिंया पदाधिकारी व दुजःपिन्सं ब्वति कयादीगु खः ।
झीगु मौलिक नेवाः दाफा भजन संगीतयात न्हूपहः, न्हूसवाः बिया न्हूपुस्ताया दथ्वी लोकंह्वाकेगु व नेवाः संगीतयात च्वन्ह्याकेगु ज्याय् ज्वःमदुगु योगदान याःगु कुमः सागर एण्ड ख्वप ब्यान्ड (सिद्धिसागर प्रजापति, रोजमान महर्जन, अमन माली, रोशन बज्राचार्य, सुमन गैडा, रोशिक जधारी, विके प्रजापति, प्रविन लाखाजु, रामसुन्दर धुसु, शरद देउला) लगायत हेटौंडा उपमहानगरपालिकायात वंगु मिति २०८२ श्रावण १ गतेनिसें नगर कार्यपालिकाया ज्याकू, अन्तर्गतया वडा ज्याकू, स्वास्थ्य संस्थाव सेवा केन्द्रया साइनबोर्ड, लेटरप्याड व मेमेगु सरकारी भ्वँतय् अनिवार्य तामाङ् व नेपालभाषा छ्यलेगु निर्णययात च्वछासें हनेगु ग्वःसा दुगु खः सां वय्कःपिं अनुपस्थित जुयादीगु कारण हनेगु ज्या मजुल ।
दँय्दसंथें थुगु दँय् नं नेवाः समाज सेवा, नेवाः परम्परागत वा आधुनिक व्यवसायी व नेपालभाषा साहित्य व लिपिया विकासय् उल्लेखनीय योगदान यानादीम्ह व्यक्ति व संघसंस्थायात जनही नगद छगू लाख तकाया सिरपाः लःल्हायेगु ज्या जुल । थुगु दँ सिरपाः त्याकादीपिं व्यक्ति व संस्था थुकथं दु,
नेवाः समाज सेवा सिरपाः – नेपालभाषा मंकाः खलः यल
नेवाः व्यवसायी प्रोत्साहन सिरपाः – पार्वती बज्राचार्य, ज्ञान आर्ट पसः ख्वप
गिरिधरलाल नेपालभाषा सेवा सिरपाः – वरिष्ठ साहित्यकार फणिन्द्र रत्न बज्राचार्य
अथेहे केन्द्रया इनापकथं थीथी प्रदेश, जिल्ला, पालिका व आवद्ध खलःपुचःपाखें नं थाय्थासय् थीथी ज्याझ्वः यानाः ३१ क्वःगु बुसादँ हनेगु ज्याझ्वः जुल ।