नेवा: अनलाइन न्युज – ललेन्द्र शाक्य | २०७९ जेठ १५, आइतबार
नेवाःतय् राष्ट्रिय संगठन नेवाः देय् दबूयात नेवाः अधिकार सिरपाः लःल्हाये ज्याझ्वः थौं ने.सं. ११४२ बछलागा चःह्रे आइतवाः क्वःचाःगु दु ।
नेवाः न्ह्यलुवाः डा. महेशमान श्रेष्ठ व वय्कःया तिरिमय्जु मोहिनी श्रेष्ठं पलिस्था यानातःगु नेवाः अधिकार सिरपाः नेवाः ख्यलय् थीथी विधाय् योगदान बियावयाच्वंगु खलः पुचःयात निरन्तर रुपं लःल्हानाः वयाच्वंगु खःसा थुगु दँय् नेवाः देय् दबूयात लःल्हाःगु खः ।
सिरपाः ल्यज्या पुचःपाखें नेवाः देय् दबू नं नेवाः जातीया राजनीति सांस्कृतिक अधिकार कायेगु नितिं वंगु निगू त्याः दशक न्ह्यःनिसें निरन्तर रुपं आन्दोलन यानाः वयाच्वंगुलिं थुगु सिरपाः देय् दबूयात लःल्हायेगु निर्णय याःगु खः ।
न्ययद्वः तकाया धनराशीया नेवाः अधिकार सिरपाः जनकवि दुर्गालाल श्रेष्ठया मूपाहाँसुइ थौं आइतवाः बछलागा चःह्रे (जेष्ठ १५ गते) येँया क्षेत्रपाति पार्टी प्यालेसय् छगू ज्याझ्वःया दथुइ जूगु खः ।
वि.सं. २०७० सालय् नीस्वंगु नेवाः अधिकार सिरपाःया कजि डा. महेशमान श्रेष्ठया सभानायःसुइ न्ह्याःगु उगु सिरपाः लःल्हायेगु ज्याझ्वलय् सिरपाः दाता मोहिनी श्रेष्ठया नं उपस्थिति दूगु खः ।
ज्याझ्वलय् नेवाः अधिकार सिरपाः समितिया दुजः शाक्य सुरेनं लसकुस न्वचू बियादीगु खःसा सिरपाः ल्यज्या पुचःया दुजः डा. पुष्पराज राजकर्णिकारं नेवाः देय् दबूयात नेवाः अधिकार सिरपाः छाय् लःल्हायेमाल धैगु विषयस थःगु नुगःखँ तयादीगु खः ।
साहित्यकार शशीकला मानन्धरं सिरपाःपौ ब्वनाः न्यंकादीगु उगु ज्याझ्वलय् मूपाहाँ जनकवि दुर्गालाल श्रेष्ठं नेवाः अधिकार सिरपाः नेवाः देय् दबूया नायः पवित्र बज्राचार्ययात लःल्हानादीगु खः ।
ज्याझ्वलय् सिरपाः लःल्हानाः कायेधुंकाः नेवाः देय् दबूया नायः पवित्र बज्राचार्यं थःगु नुगःखँ तयादीगु खःसा सिरपाः समितिया दुजः डा. मनोजमान श्रेष्ठ नं थःगु नुगःखँँ तयादीगु खः ।
ज्याझ्वः सिरपाः समितिया कजि लिसें ज्याझ्वःया सभानायः डा. महेशमान श्रेष्ठ क्वचायेकादीगु खःसा ज्याझ्वः सुरेशकिरण मानन्धरं न्ह्याकादीगु खः ।