नेवाः देय् दबू अध्ययन अनुसन्धान विभागया ग्वासलय् वर्तमान इलय् चर्चा जुयाच्वंगु नेपाःया संविधान २०७२ यात संशोधन यायेगु विषयय् विज्ञतय् दथुइ सहलह ज्याझ्वः जुल । विभागं तयार यानातःगु २५ बुंदे संशोधन प्रस्तावया विषययात कयाः विज्ञ सभा जूगु खः । ज्याझ्वलय् पुलांम्ह महान्यायाधिवक्ता डा. मुक्ति प्रधानं सैद्धान्तिक व ब्यवहारिक पक्षयात ध्यानय् तयाः संविधान संशोधन यायेमाःगु खँ कनादिल । महान्यायाधिसतय् मुँज्याय् सरकारयात संविधानया मूलभूत तत्व प्रति सचेत जुयाः मछिंगु विषययात कयाः जक संशोधनया लागिं थःपिसं सुझाब बियागु कनादिसें वय्कलं प्रतिगमन मखुसें प्रगतिशील ढाँचां संविधान संशोधन यायेगु प्रतिवद्धता सकसियां अपेक्षा खः धयादिल ।
नेवाः देय् दबूया नायः रश्मिला प्रजापतिया सभापतित्वय् जूगु उगु विज्ञ सभाय् शासकीय स्वरुप व निर्वाचन प्रणालीयात परिमार्जन यायेमाःगु व उचित ढंगं प्रदेशया सिमा संशोधन यायेगु नं पाय्छि हे जुइगु खँय् सकलिं सहमत जूगु खः । अध्ययन अनुसन्धान विभागया संयोजक व नेवाः देय् दबूया न्वकु उमेश स्थापितं जनजातिया संविधानय् अधिकार सुनिश्चित यायेत थःपिसं सहलह यानाः थुगु संशोधनया प्रस्ताव तयार यानागु कनादिल । देय् दबूया संरक्षक नरेश ताम्राकारं कार्यकारी राष्ट्रपति प्रणाली वा स्थानीय तह म्हो यायेगु विषयय् आयोग दयेका कार्यान्वयन यायेमाःगु खँ कनादिल । विद्धान डा. पुष्पराज राजकर्णिकारं संविधान संशोधनया हल्ला जूसां उकियात मूर्त रुप बिइगु ज्या अनिश्चित जुयाच्वंगु कनादिल ।
पुलांम्ह मन्त्री राजेन्द्र श्रेष्ठं न्हापा नं उच्च जातिया एकाधिकारया कारणं नेवाः स्वायत्त राज्य नेपालमण्डल प्राप्त मजूगु कनादिसें वर्तमान संविधान संशोधनय् न्हापांगु प्राथमिकता हे नेवाः स्वायत्त राज्य जुइमाः धयादिल । मेमेगु प्रदेशया स्वीकृति मकासें छुं नं मेगु प्रदेश दयेके मदइगु प्रावधानं स्वायत्त राज्य स्थापनाय् पंगः थनाच्वंगु वय्कलं कनादिल । उगु ज्याझ्वलय् विज्ञपिं भगवान शाक्य, सुजीव बज्राचार्य, श्रीकृष्ण महर्जन, बालकृष्ण श्रेष्ठ, शरणगोपाल महर्जन व रविन्द्र श्रेष्ठपिसं थः थःगु कथं संविधान संशोधनया बुंदाय् विमति तयादीगु खः । – कृष्ण प्रजापति
