नेवाः देय् दबूया संयोजनय् थीथी खलः पुचःया मंकाः ग्वसालय् म्हिगः जेष्ठ १८ गते हाकूगु न्हि हनेगु ज्या जुल । सनिलया ४ निसें ५ ता ईतक येँया बसन्तपुरय् च्वंगु दशअवतार दबुली छगू ज्याझ्वःया दथ्वी हाकुगु न्हि हनेगु ज्या जूगु खः ।
वि.सं. २०५६ साल जेष्ठ १८ गते सर्वोच्च अदालतं तत्कालीन येँ महानगरपालिका, धनुषा व राजविराजया स्थानीय निकायस कामकाजी भाषा कथं स्थानीय मातृभाषा मछ्यलेत वा मछ्ययेकेत आदेश जूगु खःसा अदालतं थथे आदेश बिइधुंकाः दँय् दसं ज्येष्ठ १८ गतेया दिंयात हाकूगु न्हिकथं हनावयाच्वंगु खः ।
संविधान जारी जुइधुंकाः दिपाः कयाच्वंगु थुगु ज्याझ्वः प्रदेशं मातृभाषायात कामकाजी भाषा कथं नालेत विधेयकया तयारी यानाच्वंगु व पहिचानया मुद्दायात हाथ्या बीकथं थीथी पुचलं कुतः यानाच्वंगु सन्दर्भ लिसें महानगर व नगरपालिकाय् नं मातृभाषायात कामकाजी भाषाकथं मान्यता बीकेत दबाब बीमाःगु आवश्यकता दु ।
उगु ज्याझ्वलय् थीथी खलः पुचःया थःथःगु ब्यानर प्रदर्शन व नारा दूगु प्लेकार्ड ब्वज्या जूगु खःसा थीथी कवि कवयित्री लिसें कलाकःमिपिन्सं भाषिक जागरणया चिनाखँ, म्ये न्ह्यब्वःगु खः ।