नेवाः देय् दबू येँ महानगर समितिया न्हापांगु बुसादँया लसताय् शनिवाः छगू ज्याझ्वःया दथुइ लसता पौया पितब्वज्या जुल । कोपुण्डोलय् च्वंगु सातोआकी भवनय् जूगु ज्याझ्वलय् लसता पौया पितब्वज्या याःगु खः ।
देय् दबू येँ महानगर समितिया नायः शोभा महर्जन वज्राचार्यया सभापतित्वय् वय्कलं हे लसकुस यासें न्ह्याःगु ज्याझ्वलय् मूपाहा येँ महानगरपालिकाया उपप्रमुख सुनिता डंगोल, विशेष पाहां तारकेश्वर नगरपालिकाया प्रमुख कृष्णहरी महर्जन, नेवाः देय् दबूया संरक्षक मल्ल के. सुन्दर, देय् दबूया केन्द्रीय नायः पवित्र वज्राचार्यलिसें लसता पौ पिथनेत आर्थिक ग्वाहालि यानादीपिं व्यक्तिपिंसं मंकाःकथं उगु लसता पौया पितब्वज्या यानादीगु खः ।
ज्याझ्वलय् नवासें मूपाहां येँ महानगर उपप्रमुख डंगोलं झी नेवाःत आः राज्यया हरेक निकायय् थ्यंकेगु लँपुइ वनेगु स्वयेमाः धयादिल । झी नेवाःया राजनीति धाल कि न्हाय् कय्कुंकेगु व लोक सेवाया जाँच बीगु धाल कि थ्व झीगु ज्या मखु फःफः तुलेगु बानीं झी दक्व ख्यलय् लिउने लानाच्वंगु वय्कःया धापू दु ।
डाक्टर, पाइलट, इन्जिनियर थेंज्याःगु विषय अध्ययन याये फुपिं झी नेवाःतय्सं लोक सेवा जाँच बीगु लागि जक छाय् अध्ययन याये फइमखु धासें आः मस्त विदेशय् छ्वयेगु पलेसा लोक सेवाया जाँच बीगुपाखे ध्यान बीत न वय्कलं इनाप यानादिल ।
तारकेश्वर नगरपालिकाया प्रमुख महर्जनं तारकेश्वरयात विकासया लँपुइ यंकेत राज्यया थीथी सुविधायुक्त भौतिक संरचना निर्माण यायेगु निंतिं कुतः जुयाच्वंगु जानकारी बियादिल । लिसें वय्कलं थः नेवाः जूसां भाय् ल्हायेगु बानी मदयाच्वंगु व देय् दबूया बारे नं अपाय्सकं जानकारी मदयाच्वंगुलिइ ज्याझ्वलय् वयाः थःत नेवाः जूगुलिं गर्व याये खंगु खँ कनादिल ।
संरक्षक मल्ल के सुन्दरं देय् दबू नीस्वंगु ई व थौया अवस्थाय् देय् दबूया संरचनाय् गाक्कं हिउपाः वयेधुंकूगु खँ कनादिसें देय् दबूया वर्तमान सांगठनिक संरचनाय् केन्द्रनिसें वडा तहं तक यानाच्वंगु ज्याझ्वः, गतिविधि, क्रियाकलाप दक्वं संगठनयाके जानकारी दःसा जक देय् दबूया औचित्य दइ धयादिल । देय् दबूया केन्द्रं यायेमाःगु ज्या नं प्रादेशिक संरचना यानाच्वंगु व छगू तहपाखें याःगु ज्याय् मेगु तहयात जानकारी तकं मदइगु खःसा आःया सांगठनिक संरचना अर्थहीन जूगु वय्कःया धापू दु ।
उगु इलय् देय् दबूया छेँ येँ महानगर समितिं याःगु इनापकथं समितिया त्रिरत्न कोष (टीआरके ग्रुप)पाखें न्यय्द्वः, असं कोथुननि बचाउ अभियानपाखें झिंच्याद्वः, पशुपति अमलाकोट कचहरीया द्वारे पूर्ण डंगोलं झिद्वः, देय् दबू १८ वडापाखें झिंखुद्वः, श्रीकृष्ण डंगोल (पशुपति)पाखें ५,५५५÷– तका दां संरक्षक मल्ल के. सुन्दरयात लःल्हानादीगु खःसा महानगर समितिया सल्लाहकारपिं मय्जु गीता श्रेष्ठ महर्जनं नीद्वः, सानुराजा वज्राचार्य व विजयलाल कायस्थं झिद्वः, झिद्वः व तुलसी साय्मिं न्याद्वः तका दां देय् दबूया नायः वज्राचार्ययात लःल्हानादीगु खः ।
उगु इलय् विशेष पाहां तारकेश्वर नगर प्रमुख महर्जनं असार महिनाया तलब दबू छेँया निंतिं ग्वाहालि यायेगु प्रतिवद्धता प्वंकादीगु खः । स्रोत – नेपालभाषा टाइम्स