स्वनिगःलिसे सतिगु धादिङ जिल्लाया दुर्गम गां बुढाथुंगय् नेपालभाषा प्रशिक्षण न्ह्याःगु दु । नेवाः देय् दबूया समन्वयय् व गंगा जमुना गाउँपालिकाया आर्थिक ग्वाहालिइ उगु नेपालभाषा प्रशिक्षण न्ह्याःगु खः। नेपालभाषालिसें नेपाल लिपिया नं प्रशिक्षण न्ह्यानाच्वंगु कक्षाय् उगु गामय् च्वंपिं निसः स्वयां अप्वःसिनं प्रशिक्षण कयाच्वंगु दु । भाषा प्रशिक्षण उलेज्याझ्वलय् नेवाः समाज बुढाथुंगया नायः नविन श्रेष्ठ, गंगाजमुना गाउँपालिका ७ या वडा सदस्य हरिश्चन्द्र अधिकारी, नारायणकुमार श्रेष्ठ, राजकुमार श्रेष्ठ लगायतं भाषा प्रशिक्षणपाखें नेवाः समुदायया भाषा, कला, संस्कृतियात सीके, थुइके फइगु नापं थुकिया उन्नवयनय् योगदान यायेत ग्वाहालि जुयगु विश्वास प्वंकादीगु दु ।
कृष्ण प्रजापतिं कयाच्वनादीगु भाषा व लिपि प्रशिक्षणय् वय्कलं गांया प्रत्येक परिवारयात डा. तुयुबहादुर महर्जनं च्वयादीगु खस नेपालभाषा खँग्वःधुकू व नरेशवीर शाक्यं च्वयादीगु नेपालभाषा नांया भाषा प्रशिक्षया सफू छगू छगू इनादीगु खः । स्वलातक न्ह्याइगु भाषा प्रशिक्षण कक्षा न्हियान्हिथं थीथी इलय् प्यथाय् न्ह्यानाच्वंगु दु । सुथसिया ७ निसें ९ ताः ईतक स्थानीय सामुदायिक भवनय् बाँगेसालय्, सुथसिया ११ निसें न्हिनिसिया १ ताः ईतक सामुदायिक भवन साँधपिपल, सनिलया ४ निसें ५ ताः तक बद्री विशाल मा.वि. बुढाथुंग व बहनिसिया ६ निसें ८ ताः तक गैरीगाृँ सामुदायिक भवन तल्लोहटियाय् न्ह्यानाच्वंगु दु । प्रत्येक छगू कक्षाय् न्यय्म्हया ल्याखं निसःम्ह नेवाःतय्सं भाषा व लिपि प्रशिक्षण कयाच्वंगु दु ।
(स्रोत – नेपालभाषा टाइम्स)