वंगु ने.सं. ११४४ पोहेलाथ्व दशमी, २०८० माघ ६ गते शनिवाः येँया एवन व्यांक्वेटय् नेवाः देय् दबूया निक्वःगु राष्ट्रिय परिषदया मुँज्या क्वचाल । नेवाः देय् दबूया नायः भाजु पवित्र बज्राचार्यया नायःसुइ न्ह्यागु उगु ज्याझ्वलय् देय् न्यंकया थीथी समितिया पदाधिकारी व राष्ट्रिय परिषदया दुजःपिन्सं ब्वति कयादीगु खः।
ज्याझ्वलय् देय् दबूपाखें दच्छियंक याःगु थीथी ज्याझ्वःया सांगठनिक प्रतिवेदन, वंगु आ.व.या लेखा परिक्षण प्रतिवेदन, थुगु दँया पाैष मसान्ततकया आर्थिक विवरण, वइगु दँया अनुमानित वजेट पारित व वइगु दँया नितिं लेखा परिक्षक नियुक्ति यायेगु ज्या जुल । अथेहे नायः पवित्र बज्राचार्यजुं वइगु दच्छियंकं यायेगु ज्या भावी कार्य योजना न्ह्यब्वयादीगु खः ।
थुगु मुँज्याय् नेपाःया पूर्वया तेह्रथुम, झापा निसें कयाः पश्चिमया कैलाली जिल्लातकया प्रतिनिधिपिं झायाः दच्छियंकं जूगु ज्याया समिक्षा, मुल्यांकन नापनापं आःवइगु दँय् यायेगु थीथी १२ मूल ज्याझ्वः नापं थीथी कार्य योजना पारित याःगु खः । उकि मध्ये मूलरूपं बागमती प्रदेश सरकारं नेपालभाषायात नं कामकाजी भाषाकथं छ्यलेत तयरी यानाच्वंगु अवस्थाय् देय् दबूया बागमती प्रदेश अन्तर्गतया दक्व समितियात छ्यालाः प्रत्येक पालिक पालिकाय् नेपालभाषा छ्यलेफइगु अवस्था दयेकेत माःगु जया न्ह्याकेगु व उकिया नितिं छगू कार्यदल नं दयेकेगु ज्या जुल । अथेहे नेपाल सरकारं सरकारी दस्तावेजय् नेपाल संवत् छ्यलेगु धकाः निर्णय याःगु अवस्थाय् थुकिया कार्यन्वयन यायेत माःगु ज्या न्ह्याकेगु व उकिया नतिं छगू कार्यदल दयेकेगु ज्या जुल ।
थ्व बाहेक वर्तमान अवस्थाय् नेवाःतय्त जुयाच्वंगु थीथी समस्या, घटना परिस्थितिया चर्चा यायेगु उकिया निराकरणाया नितिं माःकथं थीथी ज्याझ्वः दयेका न्ह्यांवनेगु निर्यण जूगु खः ।