वंगु ने.सं. ११४३ दिल्लागा द्वादशी, २०८० असार २९ गते नेवाःतय् राष्ट्रिय संगठन नेवाः देय् दबूया थःगु हे छेँ दनेगु निंतिं जग स्वनेज्या जुल । येँ मनपा १५ वडास्थित चःमतिइ स्थानीय चःमति जग्गा एकीकरण आयोजनायाके न्याना काःगु जग्गाय् म्हिगः पुजा यासें जग स्वनेगु ज्या जूगु खः ।
उकी नेवाः देय् दबूया नायः पवित्र वज्राचार्य प्रमुख जुयाः लुम्बिनी विश्व–विद्यालयया पुलांम्ह कुलपति प्रा.डा. नरेशमान वज्राचार्यं मूल पुजारी जुयाः पूजा यानादीगु खः । जग स्वनेगु ज्या जूबलय् क्वंचा खिं थानाः मंगल धुन हालेगु ज्या जूगु खः ।
ज्याझ्वःयात सम्बोधन यासें देय् दबूया नायः पवित्र वज्राचार्यं नेवाःतय् राष्ट्रिय संस्थाया थःगु हे छेँ नेवाः भूमिइ हे दनेत्यंगु लसताया खँ खः धासें थ्व छेँ धस्वाकेगु लागिं ग्वाहालि यानादीत सकसितं इनाप यानादिल ।
ज्याझ्वलय् नेपालभाषा मंकाः खलःया नायः जनकवि दुर्गालाल श्रेष्ठ, देय् दबूया पुलांम्ह नायः मल्ल के. सुन्दर, समाजसेवी पञ्चवीरसिंह तुलाधर, पुलांम्ह उपप्रधानमन्त्री प्रकाशमान सिंह, पुलांम्ह मन्त्री राजेन्द्र श्रेष्ठ, जीवनराम श्रेष्ठ, पुलांम्ह मेयर विद्यासुन्दर शाक्य, बागमती प्रदेशया सांसद शैलेन्द्र वज्राचार्य, येँ मनपाया उपमेयर सुनिता डंगोल, पुलांम्ह उपमेयर हरिप्रभा खड्गी श्रेष्ठ लिसें येँ मनपाया थीथी वडाया वडा अध्यक्षपिं, देय् दबूया पदाधिकारीपिं लगायत भाषा ख्यःया आपालं न्ह्यलुवा व कार्यकर्तापिनि तःधंगु उपस्थिति दुगु खः ।
स्रोत – नेपालभाषा टाइम्स