थ्व हे वइगु यंलाथ्व सप्तमी, २०८० असोज ५ गते नेवाः देय् दबूया नीगुक्वःगु बुसादँया लसताय् येँ छगू ज्याझ्वः यासें तःजिक हनेत्यंगु दु । नेपाल सरकारया उपप्रधान तथा गृहमन्त्री नारायणकाजी श्रेष्ठया मूपाहाँसुइ येँया क्षेत्रपाटी पार्टी प्यालेसय् जुइगु उगु ज्याझ्वलय् दँय्दसं थें नारायणदेवी तीर्थ समाजसेवा सिरपाः, नारायणदेवी तीर्थ व्यवसायी प्रोत्साहन सिरपाः व गिरिधरलाल नेपालभाषा सेवा सिरपाः नं लःल्हाइगु खः । उगु सिरपाः प्रत्येक विधाय् म्हती छगू छगू लाख तकाया खः । थुगु दँय् डा.महेशमान श्रेष्ठ व नेवाः समाज भरतपुरयात मंकाःकथं नेवाः समाज सेवा, नेपालमण्डल टिभीयात व्यवसायी प्रोत्साहन व प्रा.प्रेमशान्ति तुलाधर व नेपाल लिपि गुथियात मंकाःकथं नेपालभाषा सेवा सिरपाः लःल्हाइगु खः ।
अथेहे थ्व हे लसताय् देय् दबूया थीथी प्रदेश, जिल्ला व पालिका समितिपाखें थःथःगु लागाय् थीथी ज्याझ्वः यासें नीगुक्वःगु बुसादँ तःजिक हनेत्यंगु दु ।