ने.सं. ११४४ यंलाथ्व सप्तमी, २०८१ भाद्र २५, मंगलबार, कुन्हु नेवाः देय् दबूया स्वीक्वःगु बुसादँ नेपाः ब्यांक्वेट, खुसिबुँ येँ तःजिक क्वचाल । बागमती प्रदेश सरकारया कृषि तथा पशुपन्छी विकास मन्त्री प्रकाश श्रेष्ठया मूपहाँसुइ थीथी ज्याझ्वः यासें क्वचाःगु खः । देय् दबूया नायः पवित्र बज्राचार्यया नायःसुइ जूगु उगु ज्याझ्वलय् दँय्दसं थें नेवाः सामाजिक, संस्कृति, अधिकार, सम्पदा संरक्षणनाप स्वापू दुगु ज्याय् च्वछायेबहःगु योगदान याःगु संस्था वा योगदान ब्यूम्ह व्यक्तियात बिया वयाच्वंनागु नारायणदेवी तीर्थ समाज सेवा सिरपाः थुगुदँय् कोडिङ/डिकोडिङ सुत्रं नेपाल संवत्यात थौंया र्इकथं कम्प्युटरय् दुथ्याकेत ताःलाकूम्ह व्यक्तित्व प्रा.डा.र्इ.भगवानदास मानन्धर, नेवाः परम्परागत व्यवसाय वा आधुनिक व्यवसाय न्ह्याका वयाच्वंगु व्यवसायिक संस्था वा व्यक्तियात बिया वयाच्वंनागु नारायणदेवी तीर्थ व्यवसायी प्रोत्साहन सिरपाः थुगुदँय् यलया थसि (सिद्धिपुर)या म्हसीका जुयाच्वंगु सुयागु सुकू थायेगु ज्यायात प्रवर्द्धन व विस्तार यानाः देश/विदेश थ्यंकेत योगदान याःगु संस्था सिद्धिपुर सामुदायिक सिकार्इ केन्द्र व नेपालभाषा, नेपालभाषा साहित्य व लिपि ख्यलय् च्वछायेबहःगु योगदान याःगु संस्था वा व्यक्तियात बियावयाच्वनागु गिरिधरलाल नेपालभाषा सेवा सिरपाः थुगुदँय् खुगु दशकनिसें नेपालभाषाया थीथी भाषिक, संस्कृतिक, सम्पदा, अनुसन्धान सम्बन्धि सफू च्वयाः सेवा यानाच्वनादीम्ह अनुसन्धानविद्/भाषाविद्/अनुवादक काशीनाथ तमोटजुयात लःल्हायेगु ज्या जुल । अथेहे बागमती प्रदेश सरकारपाखें नेपालभाषायात प्रदेश सरकारया कामकाजी भाय् घोषणा याकेत प्रदेश सरकारी कामकाज सम्बन्धी ऐन,२०८० पारित यायेगु ज्याय् मन्त्री स्तरीय नेतृत्व यानादीम्ह माननीय पुकार महर्जन, बागमती प्रदेश सरकारी कामकाज सम्बन्धी भाषा ऐन, २०८० कार्यान्वयन शुभारम्भ घोषणा व भाषा दिवस २०८१ ग्वसाः ग्वयाः बागमती प्रदेशय् नेपालभाषा सरकारी कामकाजया भाषाकथं छ्यलाबुलाया सुनिश्चितता नितिं मन्त्री स्तरं नेतृत्व यानादीम्ह माननीय शैलेन्द्रमान बज्राचार्ययात विशेष सम्मान व फ्रान्सया राजधानी पेरिसय् जूगु पारालिम्पिकया के-४४ क्याटगोरीअन्तर्गत महिला ५७ केजी क्वय्या प्रतिस्पर्धाय् ऐतिहासिक कांस्य पदक त्याकेत ताःलाःम्ह पलेशा गोवर्द्धन श्रेष्ठ, काजकस्थानय् वंगु १५ जुलाईनिसें १९ जुलाईतक न्ह्याःगु विश्व स्ट्रेन्थ लिफ्टिङ प्रतियोगिता अन्तर्गत बेन्च प्रेस बिधाय् स्वर्ण पदक त्याकादीम्ह मार्सल आर्टसया ग्रान्डमास्टर केदारेश्वरमान स्थापितयात कासा ख्यलय् च्वछाये बहःगु उपलब्धी हासिल यानादीपिं कासामिपिन्त नं हनेगु ज्या जुल । अथे हे तःदँ न्ह्यःनिसें न्ह्यानाच्वंगु नेपालभाषा आन्दोलनया हे छगू अंशकथं थौंकन्हय्या सुचना प्रविधिया तःधंगु अंग जुयाच्वंगु गुगल ट्रान्सलेशनय् नेपालभाषायात दुथ्याकेगु नितिं वर्ल्ड नेवाः अर्गनाइजेशनया मूवंगु योगदान व नेपाःया गौरव राष्ट्रिय संवत् नेपाल संवत्यात न्हियान्हिथं छ्यलाबुलाय् हयेगु नितिं तसकं अःपुक छ्यलेजीक मोबाइल एप व कम्प्युटर विजार्ड दयेकाः नेपाल संवत्या आन्दोलनयात तिबः बीगु ज्याय् मूवंगु योगदान यानादीगुलिं स्पाइरालोजिक्स र्इन्टरनेशनल प्रा.लि.यात नं हनेगु ज्या जुल ।
ज्याझ्वलय् बागमती प्रदेश सरकारया सामाजिक विकास मन्त्री मा. हरिप्रभा खड्गी श्रेष्ठं विशेष पाहाँ व संघीय सांसद व पूर्वमन्त्री विराजभक्त श्रेष्ठ, भाषा आयोगया दुजः सुरेश किरण मानन्धर, पूर्वमन्त्री एवं सल्लाहकार जीवनराम श्रेष्ठ, येँ महानगरपालिकाया उपमेयर सुनिता डंगोल, संरक्षक मल्ल के.सुन्दरजुं पहाँकथं ब्वति कासें भिंतुना देछानादीगु खः ।
अथेहे स्वीक्वःगु बुसादँया लसताय् नेवाः देय् दबू उदयुरया ग्वसालय् बेलका नगरपालिका रामपुरय् अन्तरक्रिया, नेवाः देय् दबू गैडाकोटया ग्वसालय् लच्छिया नेपालभाषा तालिम, श्रीकृष्ण सृजनशील भजन खलःया ग्वसालय् बृहत लाखें प्याखं प्रदर्शनी, नेवाः देय् दबू खोटाङय् भिंद्यो प्राणप्रतिस्था व अन्तरक्रिया, नेवाः देय् दबू जिल्ला समिति सुनसरीया ग्वसालय् अन्तरक्रिया ज्याझ्वः जूगु खः ।
