नेवाः देय् दबू नागार्जुन नगर समितिया अधिवेशन तःजिक क्वचाल

नेवाः देय् दबू, नागार्जुन नगर समितिया निक्वःगु नगर अधिवेशन २०८१ असोज १९ गते शनिवाः थापा पार्टी प्यालेस फुस्कुइ भव्य रुपं जुल । नागार्जुन नगरपालिका कार्यवाहक मेयर तथा उपमेयर सुशीला अधिकारी, मूपाहाँसुइ, नेवाः देय् दबू केन्द्रिय समितिका सचिव मचाराजा श्रेष्ठ, नागार्जुन नगरपालिका वडा नं २ या अध्यक्ष थुमराज के.सी., वडा नं ३ या अध्यक्ष उमेश लामा, वडा नं. ६ देवेन्द्रराज गिरीं पाहाँकथं ब्वति कयादीगु खः ।अथेहे श्री तौखेल हाइट बलामी गुथि समाज टौखेल, पचली भैरव गुथि ईचाडोल, फेय् ख्वा मानन्धर गुथि डाँडापौवा, कालिका माई संयुक्त समाज गुथि गौरी गाँउ व जय भीमसेन विकास समाज, भीम ढुंगा निसें सहभागीपिं र्याली यानाः थापा पार्टी प्यालेसय् ज्याझ्वः याःगु खः । उगु सभाय् दादापौवा व हरिसिद्धि देगःया परम्परागत वसः सहित बाँसुरी व धीमेगु बाजंया लिसें थ्यंमथ्यं ३०० म्ह मनूतय्सं ब्वति काःगु खः ।

महाधिवेशनया औपचारिक उलेज्या मूपाहां नागार्जुन नगरपालिकाया कार्यवाहक मेयर व उपमेयर सुशीला अधिकारीं सुकुन्दाय् दीप प्रज्वलन यानाः यानादीगु खः ।

अधिवेशनय् तौखेल हाइट्स बलामी गुथि समाज तौखेल, फेय् ख्वा मानन्धर गुथि व कालिका माइ संयुक्त गुथि समाजपाखें बाँसुरी व  धिमे पुचलं थीथी धुन न्ह्यब्वःगु खः ।

समितिया निक्वःगु नगर अधिवेशनयात सम्बोधन यासें नागार्जुन नगरपालिकाया कार्यवाहक मेयर व उपमेयर सुशीला अधिकारीं नेपाल सरकार व प्रदेश सरकारं नेपाल सम्वत व नेपालभाषाया छ्यलाबुला सम्बन्धय् याःगु निर्णययात कार्यान्वयन यायेत पहल यायेगु धयादिल । लिसें वय्कलं सांस्कृतिक संरक्षणय् नेवाः देय् दबू लिसे  सहकार्य यायेत नागार्जुन नगरपालिका इच्छुक दुगु खँ नं कनादिल। अथेहे वडा नं २ या अध्यक्ष थुमराज केसीं प्रदेश व केन्द्रीय सरकारं याःगु सरकारया कामकाजीया भाय् व नेपाल संवत प्रयोग सम्बन्धी याःगु निर्णय कार्यान्वयन यायेगु प्रतिवद्धता नं प्वंकादीगु खः । ज्याझ्वलय् नेवाः देय् दबू स्वनिग विशेष प्रदेश समिति, येँ जिल्ला समितिया प्रतिनिधि व पदाधिकारीपिनिगु नं उपस्थिति दूगु खः ।

उगु अधिवेशनपाखें अजित पुटुवारया नेतृत्वय् २५ म्ह दुजः दुगु न्हूगु कार्यसमिति सर्वसम्मतिं ल्यःगु खः ।

Share

Leave a Reply

Your email address will not be published. Required fields are marked *