बर्दिया जिल्लाया मधुनव नगर पालिकाय् वंगु जेष्ठ १९ व २० गते निन्हुयंकं नेवाः देय् दबू लुम्बिनी प्रदेश भेला व संगठन सुदृढिकरण सम्बन्धी तालिम क्वचाःगु दु ।
नेवाः देय् दबू लुम्बिनी प्रदेश समितिया नायः मय्जु विजुला जोशीया नायःसुइ जूगु उगु भेलाय् नेवाः देय् दबूया केन्द्रीय नायः भाजु पवित्र बज्राचार्य मूपाहाँकथं ब्वति कयादिइगु खः । अथेहे केन्द्रपाखें वरिष्ठ न्वकू भाजु चन्द्रलाल राजभण्डारी, न्वकूपिं भाजुपिं उमेश स्थापित, नरेशकुमार राजभण्डारी, केन्द्रीय दुजः लोकहरि श्रेष्ठं पाहाँकथं ब्वति हयादिइगु खः ।
न्हापांगु दिनय् सुथय् माैलिक भेषभुषा, लाखे प्याखँ व झाँकी सहित नगर परिक्रमा यासें ज्याझ्वः न्ह्याःगु खः । प्रदेश भेलाय् लुम्बिनी प्रदेशय् च्वंपिं नेवाःतय्गु सरोकार दुगु थीथी विषयसं सहलह जूगु खः । अथेहे कन्हय् कुन्हु संस्था सुदृढिकरण सम्बन्धी तालिम न्ह्याःगु खः ।