नेवाः देय् दबू स्वनिगः विशेष प्रदेशया न्हूगु नेतृत्व
विश्व कीर्तिमान कायम यानादीपिं च्याम्ह नेवाः नापं भाषा ऐनया नितिं विशेष योगदान यानादीपिं च्याम्हेसित हन
नेवाः देय् दबू स्वनिगः विशेष प्रदेश समितिया निक्वःगु तःमँज्या तःजिक मध्यपुर थिमिया तिगनीइ शनिवाः क्वचाल । नेवाः देय् दबू स्वनिगः विशेष प्रदेशया नायः श्रीकृष्ण महर्जनया नायःसुइ जूगु उगु तःमँज्यां न्हूगु नेतृत्व सर्वसम्मत कथं ल्ययेगु ज्या याःगु खः । नेवाः देय् दबू स्वनिगः विशेष प्रदेश समितिया नायः कथं न्हूम्ह नायः नविन थेच्वमियात सर्वसम्मत कथं ल्यःगु दु । स्वीस्वम्हेसिया ज्यासना पुचलय् बरिष्ठ न्वकू गणेशमान श्रेष्ठ, न्वकू सुमन श्रेष्ठ, मिसा न्वकू गंगादेवी महर्जन, मूछ्याञ्जे सोभा बज्राचार्य महर्जन, छ्याञ्जे हरिबहादुर श्रेष्ठ, मिसा छ्याञ्जे मनरा प्रजापति व दांभरी रोशनी प्याथःयात सर्वसम्मतं ल्यःगु खः ।
उगु तःमुँज्या नेवाः देय् दबूया केन्द्रीय समितिया नायः पवित्र बज्राचार्य मूपाहां जुयादीगु खःसा विशेष पाहां नेवाः देय् दबूया संरक्षक नरेश ताम्रकार जुयादीगु खः । ज्याझ्वलय् विश्व कीर्तिमान कायम यानादीपिं च्याम्ह नेवाःतय्त हंगु दु । सम्मानित जुयादीपिं विश्व कीर्तिमान कायम यानादीपिं च्याम्ह थुगु कथं दुः १) नेपाःया मोहडा व चीनया मोहडा निगुलिंपाखें सगरमाथाया च्वकाय् थ्यंकादीम्ह न्हापांम्ह मिसा पत्रकार कल्पना महर्जन, २) सगरमाथाया बेसक्याम्प ५३६४ मिटर च्वय् एल्बम पितब्वया यानादीम्ह सुरेन्द्र महर्जन सागर, ३) ५० गू देय्या ५० गू भाषाय् लय्चिना, म्ये हालादीम्ह सन्तोष श्रेष्ठ, ४) संयुक्त राष्ट्रसंघया १९३ गू दय्या ध्यबा मुंकादीम्ह दिपेन्द्ररत्न शाक्य, ५) छगू हे सिजनय् १३ न्हूया दुने सगरमाथाय् थ्यंकादीम्ह पुर्णिमा श्रेष्ठ, ६) मन्त्री जुया ४ घण्टा ५ मिनट २० सेकेण्ड मदिक्क म्ये हालादीम्ह रामवीर मानन्धर, ७) ता ई तक दना सीतार थानादीम्ह सीतामैंया राजचल व ८) घौछि तक फुटबल बँय् मथिकूसे ९ हजार २ सय १९ क्वः थ्वानादीम्ह सजन डंगोल । उगु ज्याझ्वलय् बागमति प्रदेशय् नेपालभाषा व तामाङ भाषायात सरकारी कामकाजि भाषाया रुपय् लागू यायेगु नितिं प्रदेशया भाषा ऐन दयेकेगु ज्याय् नापं पास यायेगु व लागू यायेगु नितिं योगदान यानादीपिं सांसद नापं पुलांम्ह मुख्यमन्त्री सालिकार जमरकटेल, सांसद नापं पुलांपिं मन्त्रीपिं पुकार महर्जन, कुमारी मोक्तान, शैलेन्द्रमान बज्राचार्य, कार्यदलय् दुजः जुया ज्या यानादीपिं भाषावैज्ञानिक अमृत योञ्जन तामाङ, भाषाबैज्ञानिक प्रा. डा. ओमकारेश्वर श्रेष्ठ, नेवाः देय् दबूया बागमती प्रदेशया नायः जुया ज्या यानादीम्ह विष्णुगोपाल महर्जन व नेपाल तामाङ घेदुङया बागमती प्रदेश नायः जुया ज्य यानादीम्ह लिला कुमार घलान तामाङयात हनेज्या याःगु खः । प्रदेश भाषा ऐनया नितिं जनस्तपाखें दबाव बिइगु, अभियान न्ह्याकेगु नापं आन्दोलनया ज्याझ्वः तकं नेवाः देय् दबू बागमती प्रदेश समिति व नेपाल तामाङ धघेदुरङ बागमती प्रदेशलिसे सहकार्य याना नेवाः देय् दबू स्वनिगः विशेष प्रदेशं नेतृत्वदायी भूमिका म्हितूगु खः । (श्रीकृष्ण महर्जन, नि.नायः, नेवाः देय् दबू स्वनिगः विशेष समिति)
