नेवाः देय् दबू व मनमोहन मेडिकल कलेज (अस्पताल) दथुइ मिति २०८० श्रावण १५ गते स्वास्थ्य उपचार सम्बन्धी सम्झौता जूगु दु । सम्झौता कथं अस्पतालं आः नेवाः देय् दबूया सकलें दुजः लिसें देय् दबूया सिफारिस ज्वना वइपिं सुं नं मनूयात स्वास्थ्य उपचारय् १५ प्रतिशत तक छुट बीगु जूगु दु ।
सामान्य उपचार, ल्याब परीक्षण, एक्सरे आदि थेंज्याःगु सेवाय् १५ प्रतिशत छुट बीगु व अपरेशन, आईसीयू, भेन्टिलेटर आदि थेंज्याःगु विशेष सेवाय् १० निसें १५ प्रतिशत व ज्याथजिथिपिंत ५० प्रतिशत छुट खँ सम्झौताय् न्ह्यथनातःगु दु ।
सम्झौतापतिइ नेवाः देय् दबूपाखें नायः पवित्र वज्राचार्य, मूछ्यांज्ये सत्यनारायण डंगोल, केन्द्रीय पार्षद डा. अन्जना डंगोलं सही यानादीगु दुसा थ्व सेवाया लागिं सम्पर्क व्यक्ति कथं देय् दबू अन्तर्गतया नेवाः ल्याय्म्ह दबूया नायः सुदन मुनिकार तोके याःगु दु ।
अथे हे अस्पतालपाखें कार्यकारी निर्देशक डा. एन. शर्मा, प्रवन्ध निर्देशक डा. मूजः श्रेष्ठ व डा. निराजन सुवेदीं सही यानादीगु दु ।
थुकिया नापं देय् दबूया पहलय् जुइगु स्वास्थ्य क्याम्प, हिदान आदि ज्याझ्वलय् मनमोहन अस्पतालं ग्वाहालि यायेगु व अस्पतालपाखें प्राप्त जुइगु सुविधात लिपा थपे यानाः यंकेगु सहमति नं जूगु दु ।