नेवाः देय् दबूया संयोजन व थीथी नेवाः खलः पुचःया ग्वसालय् पोहेलाथ्व नवमि पौष २४ बुधवाः नेपाल संवत ११४५ तोखाय् झिंप्यक्वःगु नेवाः एकता दिवस जुल ।
काठमाडौं उपत्यका दुने व पिनेया थीथी थासं द्वलंद्वः सांस्कृतिक टेली सहित भव्य जुलुस पिकायेधुंकाः थनेलाछी मूल समारोह याःगु खः । नेवाः देय् दबूया नायः पवित्र बज्राचार्यया सभापतित्वय् जूगु उगु ज्याझ्वलय् मूपाहाँ कथं नेपाल सरकारया उपप्रधान व शहरी विकासमन्त्री प्रकाशमान सिंहं ब्वति कयादीगु खः। उपप्रधानमन्त्री प्रकाशमान सिंहं झीगु कला संस्कृतिया रक्षा यायेत सकल नेवाःत छप्पं जुइमाःगु धयादीगु दु । वय्कलं नेवाः देय् दबूया भाषा, संस्कृति, व पहिचान म्वाकातयेत ज्या यानाच्वनागु धयादिल । थ्व तसकं सकारात्मक खँ खः । “कानूनी प्रक्रिया पूवंकाः जनताया चाहना कथं संविधान संशोधन यायेफइ ।” वय्कलं धयादी, “संविधानं हे इलय् हे संशोधन सुनिश्चित याःगु दु ।” संविधानयात अझ प्रभावकारी दयेकेत व जनतायात अझ अप्वः अधिकार बीत संशोधन याःगु खः ।
भाषा आयोगया अध्यक्ष डा. गोपाल ठाकुरं नेपाःया संविधानय् नेपालभाषायात सरकारी कामकाजया रुपय् उल्लेख यानातःगु प्रावधान संशोधन यायेमाःगु धयादिल । ज्याझ्वलय् आदिवासी जनजाति आयोगया नायः रामबहादुर थापा मगर व नेवा: देय् दबूया संरक्षक मल्ल के.सुन्दर, नरेश ताम्राकार लगायतं नं नेवा: भाय् व संस्कृतिया संरक्षण व सम्वर्द्धनया नितिं पला: ल्ह्वनेमा:गु खँ कनादिल । ज्याझ्वलय् १२ बुँदे घोषणापत्र नं जारी याःगु दु । नेवा: देय् दबू स्वनिग: विशेष प्रदेश नायः श्री कृष्ण महर्जनं ब्वंगु तोखा घोषणापत्रय् बागमती प्रदेशया भाषा सम्बन्धी कानून कार्यान्वयनया नितिं छगू दवावात्मक ज्याझ्वःया उल्लेख नं यानातःगु दु ।